Politeerpassuit soraarsitaasut
Irakimi naalakkersuisut politiit pisortaat marluk politiitullu atorfillit untritilinnik arlalinnik amerlassusillit soraarsippaat.
Pikititsiniat salloqittaallutik politiitut atorfinissimasut paasineqarmat taamatut soraarsitsiortoqarpoq.
Amerikamiut nunanut allanut ministeriat Condolezza Rice qaammatip uuma aallartilaarnerani Irakimut tikeraarpoq. Tikeraarnerminilu Irakimi naalakkersuisut siulittaasuannut Irakimi eqqissiviilliornerit amerikamiunit qatsunneqartut nalunaarutigaa. Shiasiortut salloqqitaallutik politiitut sulisut amerikamiunit pasitsaanneqarpoq. Shiasiortullu ajornannginnerusumik sunnisiortunik taamaalillutik toqoraasinnalersimanissaat aamma pasitsaaneqarluni. Politeeqarneq Irakimi nunap iluani pissutsinut ministereqarfiup ataaniippoq. Shiasiortullu amerlanerussuteqartut tassani atorfeqarput.
Irakimi eqqissiviilliornerit ikilisarniarlugit politiit pisortaannik marlunnik soraarsitsisoqarpoq. Sunnisiortut amerikamiullu kimigiisernerisa kingunerisaanik taamatut soraarsitsisoqarsimasoq, Irakip iluani pissutsinut ministereqarfimmi oqaaseqartartoq nalunaaruteqarpoq.
Irakimi naalakkersuisut siulittaasuat qaammatit tallimat matuma siorna siulittaasunngorami Irakimi pikititsiniat ikilisarniarlugit neriorsuuteqarpoq taamaattorli ulloq manna tikillugu eqqissiviilliortoqartarluni.
Irakimi eqqissiviilliornerit qaangerniarlugit 2004-imi politiinik atorfinitsiortoqarpoq. Politiitut atorfillit 1200-t sinnillit inatsisinik unioqqutitsisimanertik peqqutigalugu soraarsitaasimasut 2000-inillu amerlanerit atorfimminnik sumiginnaasimanertik peqqutigalugu aamma soraarsitaasimasut nunap iluani pissutsinut ministereqarfimmit nalunaarutigineqarluni. Eqqissiviilliornerit Irakimi naalakkersuisut siulittaasuata ernummatigai; USA-mi præsidenti oqarasuaatikkut oqaloqatigalugu aperisimavaa eqqissiviilliornerit unitsissinnaassanngikkaluarunigit allamik taarserneqarnissi USA-mit kissaatigineqarnersoq. USA-p præsidentiata tapersersortuarniarlugu eqqissisaasimavoq, New York Times taama allaaserinnippoq.
