Politeeqarfiup pisortaa: Politikerit tunu puigorluinnarpaat

Imminoriaraluartut imminornissamilluunniit sioorasaarisut Tasiilami imaaginnavipput. Ullut tallimat ingerlanerinnaanni inuusuttut arfineq-marluk imminoriaraluarsimapput imaluunniit imminornissaminnik sioorasaarisimallutik. Taakkunannga ataaseq arnaq inuusuttoq imminut ipitikkaluarpoq, uummarsarluguli uummarteqqinneqarluni.
Allattoq Louise M. Kleemann
juunip 06-at 2008 07:11

Tasiilami politeeqarfiup pisortaa, Kristian Sinngertaat, tamakku pillugit naammagittaannarsinnaajunnaarpoq, AG-milu ullumi saqqummersumi Namminersornerullutik Oqartussat uparuarlugit.

- Politikerit allamik isumaqanngillat kitaa kisimi Kalaallit Nunaanni piusoq, tunup piunera puigorluinnarsimavaat, Kristian Sinngertaat ilaatigut taama AG-mi issuarneqarpoq.

Politeeqarfiup pisortaa Kristian Sinngertaat naapertorlugu, inuusuttut suliffissanik inissanillu amigaateqarput, amerlaqisullu ilaquttaminni najugaqarlutik.

- Inuusuttut sammisassaqartinneqanngillat neriuutaaruttarput imeruloortalersarlutik naggataatigullu imminortarlutik, Kristian Sinngertaat oqarpoq, erseqqissaavorlu tamanna Namminersornerullutik Oqartussat ajornartorsiutigigaat.

- Politikerit tunu puigorluinnarpaat, tamatumunnga piffissamik atuiumanissaannut ungasippallaartumiippugut, Kristian Sinngertaat ilaatigut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq