Politeeqarfiit politiinik amigaateqarput

Nunatsinni politeeqarfiit naammattunik politiinik amigaateqarput. Politimester Anders Linnet-illi neriuutigaa ukiuni qaninnerni politiitut atorfiit tamarmik inuttalerneqarsinnaassasut:

- Inuttaliisinnaanermut tunngatillugu ineriartorneq ukiuni kingullerni ilorraap tungaanut aallarsimavoq, tamannalu pissutigalugu nunatsinni najugaqavissut amerlanerusut atorfinitsinneqarsinnaanissaannut neriulluarpugut, Anders Linnet oqarpoq.

Nunatsinni politiitut atorfiit 125-upput.

Ukiup kingulliup naalernerani politiitut ilinniarlutik naammassisut sulilersullu 80-t missaanniittut Nunatsinni politiit 2004-mi nalunaarusiaanni erserpoq. Taakkua saniatigut inuit 21-t Danmarkimit tikisinneqarlutik politiitut atorfeqarput. Taamaalilluni politiitut atorfiit 100-innaat inuttaqartinneqarput atorfiit tamakkerlutik 125-ugaluartut.

Piukkunnaateqarluartunik amerlanernik ilinniartussarsiorluni kajumissaarinerup kingorna politiitut atorfillit amerlineqarnissaat Anders Linnet-ip neriuutigaa.

Siunnertaqarluni sulineq maannangaaq malunnaateqalereerpoq. Ukiuni kingullerni marlunni politiit ilinniarfianni ilinniartut naammattut ilinniartinneqartarput. 2001-imi qinnuteqartut amigartut qinnuteqarsimapput 2002-milu qinnuteqartut amigarpallaarneri peqqutaallutik ilinniartitsisoqarsimanngilaq.

Anders Linnet-ip ilanngullugu erseqqissarpaa politiitut atorfilittatik sulisoriinnarusullugit iliuuseqartarnitik pitsaanerulersut.

Tamatumani aningaasarsianik atorfeqarnermilu atugassarititaasunik pitsanngorsarneq kiisalu sulisoqarnermut politikkeqarneq pissutaasut, Anders Linnetip erseqqissaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat