Politeeq suliaminik sumiginnaasimasutut unnerluutigineqarpoq
Qaqortumi politeeq politikommissærilu, atorfimminni suliassanik sumiginnaasimasutut unnerluussaareerlutik, Qaqortup eqqartuussivianni ippassaq eqqartuunneqarput. Unnerluussinermut toqqammaviuvoq, angutip 20-nik ukiullip Qaqortumi isertitsivimmiitsilluni siorna marsimi imminorsimanera.
Politeeq suliassaminik annertuumik sumiginnaasimasutut unnerluutigineqarpoq, 12.000 kr.-ninillu akiliisussanngortinneqarluni. Politiip isertitaq akulikinnerusumik alakkartarsimasussagaluarlugu, ullup unnuallu ataatsip ingerlanerani alakkarsimanngilaa, aatsaallu nakkutigisani toqoreersoq nassaarisimallugu. Politeeq taanna sapaatip akunnerini marlunni eqqarsarfissaqarusuppoq, piffissamilu tassani aalajangissavaa, unnerluutigineqarnini suliareqqitassanngortissanerlugu.
Politikommissæri suliaminik sumiginnaasimasutut aamma unnerluunneqarpoq, eqqartuussivimmili pinngitsuutinneqarluni. Taanna unnerluutigineqaraluarpoq isertitsivimmi sulisut isertitanut nakkutiginnilluarsimannginnerannut akisussaasutut. Eqqartuussiviulli unnerluussut taanna tassa atortussaajunnaarsippaa, politikommissærilu pinngitsuutillugu.
Politimesterip Anders Linnet-ip oqaatigisinnaanngilaa politiip unnerluutigineqartup atorfini tigummiinnarsinnaassaneraa, eqqartuussinerup inernera suliareqqitassanngortinneqarsinnaassanersoq suli nalunarmat.
