Politeeq suli tigummigallarneqarpoq
Angut ikiaroornartut pillugit inatsimmik unioqqutitsisimasutut pasisaalluni januaarip qaammataani tigusarineqarpoq, Maniitsullu eqqartuussiviani matoqqasumik killisiorneqarluni. Sermitsiaq.ag-lu malillugu angutip tigummigallagaanera februaarip qulingiluaani sapaatip akunnerini sisamani sivitsoqqinneqarpoq.
Politimester Bjørn Bay malillugu angut suli tigummigallarneqarpoq, suliarlu matoqqasumik ingerlanneqarmat annertunerusumik oqaaseqarsinnaanngilaq. Taassumali ilisimatitsissutigaa suliassap eqqartuussivimmut anngunneqannginnerani, politiit suliaat pillugit maalaaruteqartarfimmit, eqqartuussisuserisumik innuttaasunillu marlunnik inuttaqartumit, suliaq misissorneqaleruttortoq.
Politeeq januaarimi tigusarineqarnermi kingorna Nuummut aallarunneqarpoq.