Politeeq saassukkaa
Qeqertarsuarmi politeeq tallimanngornerup arfininngornerullu unnuaani angummit 23-nik ukiulimmit saassunneqarpoq.
Allattoq Elisa Isaksen
Politiit nalliuttorsiortunut eqqissiviilliulersimasunut aggersarneqarsimasut, Qeqertarsuarmi politeeqarfiup pisortaa Morten Mandrup oqaluttuarpoq.
Politiit takkukkamik eqqissiviilliortut eqqissiimitissinnaasimavaat, taamaaleruttortorli nalliuttorsioqataasut ilaata politiip aappaa tassanngaannaq saassuppaa toqqusassilerlugulu.
Angut tigusarineqarpoq atorfilimmullu suliaminik isumaginnittumik nakuusersimasutut unnerluutigineqassalluni. 23-nik ukiulik arfininngormat inatsisit tunngaviusut naapertorlugit killisiorneqarpoq, ullunilu 13-ini tigummigallagassanngortitaalluni.