Polenimiut tikisitat
Sanasut namminersortut suliffeqarfiutaat Nuummiittoq Greenland Ground Construction A/S sulisussaarukkami Polenimiunik tikisisitsisariaqarsimavoq.
Sanasut namminersortut suliffeqarfiutaat Greenland Ground Construction A/S Nuummiittoq ukiuni sisamani pisoqaassuseqarpoq. Suliffeqarfik illunik beton-inik sanaartortuuvoq aammalu qalipaasutut suliaqartuulluni.
Suliffeqarfiup sulisut 17-t atorfissaqartippai. Suliffeqarfimmilli piginneqataasoq Leif Aagaard oqarpoq, sulisut aalakkaasut ajornakusooqisut.
- Sanasunik piukkunnaateqarluartunik sulisussarniarneq ajornakusoortorujussuuvoq, soorunami sallerpaatillugu maani illoqarfimmi sulisussarsiortaraluarpugut. Tamatumalumi saniatigut aamma Kalaallit Nunaata avataanut sulisussarsiortarluta, Leif Aagaard oqarpoq.
Taanna nangilluni nassuiaavoq, Danmarkimut, Sverigemut, Norgemut Savalimmiunullu sulisussarsiortarsimagaluarlutik ajornakusoormalli Polenimut sulisussarsiortariaqarsimallutik, tappavani inuit suliffissaaruttorpassuummata.
- Kingullermik Polenimut sulisussarsiorluta allagarsiigatta inuit 600-t missaat saaffiginnissuteqarput, Leif Aagaard oqarpoq.
Taanna nassuiaavoq, taakkunannga 10 procentiinnaat piukkunartikkitik, maannamullu Polenimiut arfineq-marluk suliffeqarfimminnut atorfinitsissimagitik.
Taanna nangilluni oqarpoq, suli amerlanerusunik atorfissaqartitsillutik, inunnik katillugit 30-t tungaanut amerlassusilinnik atorfissaqartitsigamik, tassalu imaattoq; inuit 15-t missaat suli amigaatigigitsik. Erseqqissaatigaali soorunami pisariaqanngitsoq sulisut pinngitsooratik Poleniminngaanneersuunissaat, nunatsinneersuusinnaalluarmatamigooq.
Taanna aperaarput, tusarsimagipput sulisorisatik nunatsinneersut siusinnerusukkut sooq soraarsissimaneraat.
- Suu, tassa ilaanneeriarluta ajoraluartumik taamaaliortariaqartarpugut. Suliffik paarinagu asuli imerniaannalertoqarpat taava soraarsitsisariqartarpugut, Leif Aagaard oqarpoq.
Taassumali erseqqissaatigaa, sulisunik soraarsitsisoqartillugu Polenimiunik tikisitsisoqarnissaa pillugu soraarsitsisaratik.
Taamatuttaaq Polenimiunik tikisitsineq akisusaqisoq oqaatigaa.
- Polenimukartariaqartarpugut inunnik aallerluta, Kalaallit Nunaani najugaqarnissaminnut Danmarkimiit akuersissummik peqqaartariaqarput. Aammalu maani suliffissarsiuussisarfimmi akuerineqaqqaartussaallutik. Taamaattumik allaffissornikkut pisariusorujussuusarpoq. Aammalumi allaniit akissarsiakinnerunnginniassammata tamanna nalimmassarneqaqqaartarluni, Leif Aagaard oqarpoq.
Polenimiut nunatsinnut suliartortut siulliit qammatit sisamat matuma siorna tikisinneqarput, kingulliillugooq sapaatip-akunnera qaangiummat tikipput. Taakku sulilluarsimanerat aammattaaq unnersiutigineqarpoq.
