Polenimiut soraarsitat kiisami angerlarput
Polenimiut sulisartut marluk qaammat ataaseq qaangiuttoq suliffimminniit Greenland Ground Construction-imiit soraaarsitaareerlutik Nuummi nikissinnaasimanngereerlutik kiisami nunaminnut Polenimut ullaaq aallarput.
Inuusuttut soraarsitaasut aallarsinnaasimanngillat, passii nunamiissinnaanermut sulisinnaanermullu qinnuteqarnerannut atatillugu Nunanit allanit nunasiniartunut allaffeqarfianut nassiunneqarnikuummata. Passitik aatsaat marlunngormat tiguaat ullaarlu Nuummiit Poleniliarlutik aallarput.
- Nuannaaqaagut Polen-imut angerlaleratta, manna qeqertaq qimaleratsigu.
- Imaanngilaq nunarsi nuannarinnginnatsigu, kisiannili suliffigisimasatsinni pineqarnerput pissutsillu sulisitsisutta uagutsinnut atugassarisitai pillugit. Nuuk illoqarfik kusanarluinnartuuvoq, illoraaralu ikinngutitaartoqaagut. Suna tamarmi ikkarnaateqassanngikkaluarpoq ajoranilu, suliffigisimasatsinnit eqqunngitsumik pineqarsimanngitsuugutta.
Polenimiu 22-nik ukiulik Marcin Maczynski, Nuummiit aallanngitsiarluni KNR-ip immiussisarfianut pulaartilluni, tassa taama oqaluttuarpoq. Suliffeqarfik pisaa tassaavoq Greenland Ground Construction, sanasunik Polenimiit Nuummut siornali tikisitsisartoq.
Marcin illooqqanilu Dominic siornatigut Tuluit Nunaanni Tysklandimilu qarmaasutut sulisimapput.
Illoorariit suliffigileriikkaminniit marsip pingajuanni soraarsitaapput. Sulisitsisut soraarsitsinerminnut atatillugu inuusuttut suliamut misilittagaqanngippallaartutut oqaluppallaartutullu nalilerlugit soraarsippaat. Marcin Domenic-ilu isumaqarput isumaqatigiissut malillugu 120 koruuninik akissarsiaqartinneqarnatik paasillugu 96 koruuniinnarnik aningaasarsiaqassallutik paasillugu naammagittaallioramik soraarsitaallutik.
-Isumaqassanngilasi passivut utaqqillugit qaammassuaq Nuummi susassaqarata pigatta feeriartugut. Assorsuaq uippakajaarnarsimavoq passivut tigusinnaanagit aallarsinnaanani utaqqerusaarluni. Sulisitsisorisatsinnit oqaluttuunneqartuarpugut tassa passivut tikiliivissut tassalu aallarsinnalissasugut, paasiuminaappormi pasigut taamarsuaq utaqqisariaqarsimagatsigik, kinaassuseerunnarsimavormi aamma, Marcin Maczynski aallalerluni nuannaaqisoq oqarpoq.
