Polenimiut anisinneqarnissaat SIK-mit piumasarineqarpoq
Sulinermut Inuussutissarsiuteqartut Kattuffiata SIK-ip siulittaasua, Jess G. Berthelsen, oqarpoq, Polenimiut qulingiluat sulisinnaanermut allagartaqaratik Greenland Ground Contractorsimi sulisut tuaviornerpaamik nunatsinniit anisinneqarnissaat anguniarlugu politiinut saaffiginnissuteqarniarlutik.
-Uagut piumasariniarparput maani nunaminngaanniit anisinneqarnissaat, sulisinnaanermut akuersissummik peqanngimmata, aamma ilisimagatsigu nunaqavissunik suliffissaaleqisoqartoq, taakkulu suliaannik tigusilluarsinnaasut ilisimagatsigik, Jess G. Berthelsen oqarpoq, nangillunilu: -ilisimavarpummi aamma nunaqavissut soraarseriarlugit Polenimiut tikisinneqartut, Jess G. Berthelsen oqarpoq.
Jess. G. Berthelsen isumaqarpoq, Nuup Kommuneata inatsisit malillugit pisussaaffini naammassisimanngikkaa, maannalu Polenimiut sulisinnaaanermut akuersissuteqaratik sulinerannut akisussaaqataasut:
- Tupigusuutigaara borgmesteri taama oqaaseqarsinnaammat, ilisimavarpummi avaataaninngaanniit sulisussarsiortoqartillugu Nuup Kommunea akuersissummik piniartussaasoq, maani taakku sulisinnaanissaannut; kisianni akuersissut suli pissarsiarineqanngitsoq maani sulisinnaanissaminnut akuerineqarsimapput, tamannalu borgmesterip ilisimavaa, tusagassiutitigummi ersarissumik oqariartuuteqarnikuupput sulillutik, sunaaffa sulinissamut akuersissut suli aaqqiivigineqarsimanngitsoq, Jess G. Berthelsen oqarpoq.
Jess G. Berthelsen aamma oqarpoq Nuup Kommuneata suliffissarsiuussisarfia aqqutigalugu ujartuisimagaluarlutik akuersissutinik takujumallutik, kisiannili ulloq maanna tikillutigu pissarsisinnaasimanatik, taamaattumillu taama pisoqarnera tupaallaatiginagu.
Jess G. Berthelsen isumaqarpoq, Nuup Kommuneata qulakkeersimasussaagaa Polenimiut suliffeqarfimmut ikaarsaartinnagit sulisinnaanermut akuersissummik peqarnissaat, taamaattumillu isumaqarluni Nuup Kommuneata aamma Namminersornerullutik Oqartussat akuersissummik qulakkeerinnissimannginnerminnermikkut maanna akuersissuteqaratik sulisoqarneranut akisussaasut.
