Polenip Slovakiallu akornanni qaqqarsuarni Tatrabjergini sisamanngornermi kallerrujussuarmat inuit tallimat ajunaarput taakkunannga meeqqat marluk ajunaarlutik.
Inuit allat 100-it sinnerlugit amerlatigisut ajoquserput.
Inuit sisamat Polenimi qaqqani ajunaarput, Slovakiami inuk ataaseq ajunaarluni, annaassiniartartut taama nalunaaruteqarput.,
Ajunaartoqarneranut takunnittoq TV-qarfimmi TVN24-imi oqaloqatigineqartoq oqaluttuarpoq Polenimi qaqqami Giewontimi takornariat arlaqartut kallerneranit eqqorneqarsimasut.
Qaqqamut tassunga 1.894 meterisut portutigisumut takornariat majuartarput, taassuma qaavaniippoq sanningasoq saviminermik sanaaq 15 meterisut portutigisoq 1901-mi qaqqap qaavanut inissinneqarsimasoq.
Sanningasup saviminiusup kallermit eqqorneqariaannaasarpoq.
- Taama sukkatigisumik silarlulernissaa naatsorsuutigineqarsimanngilaq aamma siulittuutigineqarsinaasimanani, Polenimi ministeriuneq Mateusz Morawieck oqarpoq.
Annaassiniartoqarnerani qulimiguullit tallimat atorneqarput.
Slovakiami angut kallermit eqqorneqarnermi kingorna qooqqumut nakkarluni ajunaarpoq.
