Polenimi naalakkersuisuutitaqartussanngortoq, Donald Tusk, ikinnerussuteqartuneersuuvoq

Aqqa nalinginnaanngilaq, aamma Polenimi, Donald Tusk-ili kashuberiuvoq, tassa inuiaqatigiit polenip avannarpasinnerusortaani, Gdanskip eqqaani najugallit, ikinnerussuteqartut. Kashuberit polenimiusuumut assingusumik oqaaseqarput, uteriittuullutillu. Donald Tuskimi aamma imminut uteriittuunerarpoq. Qineqqusaarnerup nalaani pikkunaagineqaraluarsinnarluni, naalakkersuisulli siulittaasuat, Jaruslav Kaczynski, inuinnarnik illersuisutut saqqummertarniaraluartoq, biilernermut allagartaqannginnerarlugu, pisiniarfinnilu nerisassat akii nalunerarlugit puffassimaarluni TV-kkut qineqqusaarlutik saqqummerami ajugaanissani qanillattulerpaa, qinersisartullu 41 procentii maanna tassa tunuliaqutigilerlugit. Donald Tuskip qinersisini qutsavigalugillu naalakkersuisuusimasut torersumik suleqatiserai, Kaczynskikkummi kommunisteqarallarmat Solidaritetitoqqami aallarteqatiginikuuai. Donald Tusk 13-inik ukioqarluni Gdanskimi umiarsualivimmi sulisut suliumajunnaarmata paarsisitaasimavoq, politiillu suliumajunnaartunik eqqaassinerat takusimallugu. Kingornagullu oqaluttuarisaanermik immikkut ilisimasalittut ilinniagaqareerluni atorfinissinnaannginnami pujoorfinnik qalipaasartuusimalluni, tassalu suliffini taanna aqqutigalugu kattuffilerinermigut ukiut arfinillit matuma siornatigut, maanna ajugaatitaminik partiilioqataavoq. Tuskip partiia P.O.-partii suliffeqarfinnut ajunngisaarniartuuvoq talerperlernullu qaninnerusutut oqaatigisariaqarluni.