Polen akuersivoq

Amerikamiut pilersaarumminni akornutigisinnaasatik pingaaruteqarnerpaat taamaalillutik qaangerpaat. Taamaalilluni Polen sillimaniarneq pillugu nukittorsaanissaminut ikiorneqartussanngorpoq. DR-ip Pragimi ilanngutassiortuata Polenimiut sutigut ikiorserneqassanersut ima oqaluttuaraa:

Polenimiut naalakkersuisuisa nutaat Amerikamiunut ersarissumik oqaatigisimavaat, Amerikamiut qaartartunik igeriuttakkanik Polenimut inissiissappata, taava tamanna Polenip arlaatigut pissarsiaqaatigissagaa. Amerikamiullu tamanna akuersaarsimavaat. Tassa suli isumaqatigiinniartoqaraluartoq, isumaqatigiissuteqartoqarsinnaasimavoq. Taamaattorli Polen sunik pissarsissanersoq nalunaraluartoq, Polenimi silaannakkut illersornissaq nutartigassaaqaaq, Polenimiullu Amerikamiut qaartartunut igeriuttakkanut illersuutaat pilerinartilluinnarpaat.

Nunap Polenip sanilerisaata Ruslandip, killeqarfimminut taama qanitsigisumi USA-p illersuusiorniarnera naammaginngitsorujussuuaa. Russillu oqaatigaat USA-p iliuuseriniagaa qunusaarinerusoq.

Taamaalilluni Polen ajornartorsiulerpoq. Tassami Polenimiut Amerikamiunik isumaqatigiissuteqarnermikkut isumannaatsuunissaq ungasilleriarpaat, tassami iliuusaat pillugu Russit kamattorujuussuupput.

USA-p Europami illersuusiorniarnermini nuna illersuusiorfiginiagaa tassaavoq Tjekkiet.

Maanna USA aamma Tjekkiet isumaqatigiinnialeruttorput, qanittukkullu isumaqatigiittoqarnissaa ilimagineqarpoq. Taamaattorli Amerikamiut Tjekkiami illersuusiorniarnerat inuinnarnit akerlerineqartorujussuuvoq.