Polaroil 400 mio. kr.-it atorlugit tankeqarfinnik nutarterivoq

Tamanna KNI A/S-ip nutaarsiassanik saqqummiussaani siullermi paasissutissat ilagiinnarpaat. Ilaatigut Nunatsinni niuernikkut kiffartuussinikkullu suliffeqarfiit annersaanni suliarineqartut saqqummiunneqarput. Aammattaaq nioqqutissat suut pisiarinerusarnerigut imeruersaatillu sorliit pisiarineqarnerusarnersut atuarneqarsinnaavoq.
Allattoq Peter Troelsen, Simon Uldum
februaarip 24-at 2013 08:24

Suliniut "KNR 2016-ip tungaanut", KNI-p periusissatut suliniutaata annersarisaa aamma immikkut sammineqarpoq. Pisortap Claus Jensenip erseqqissaatigaa ukiuni tullerni pingasuni periusissatigut suliat aqqutigalugit KNI-p pilersuisuinnartut inissisimatikkunnaarlugu pisisartut qitiutillugit niuernermik kiffartuussinermillu suliffeqarfittut nutaaliaasutut allanngortinneqassasoq.

-Sulisutta ilarpassui sulinerminni annerusunik unammisassaqarusupput. Taakkulu suliffeqarfimmut ilasarnaataammata kissaataat naammassiniartussaavagut. Taamaammat Kalaallit Nunaanni suliffeqarfiit pitsaanersaattut inissikkusuppugut, Claus Jensen oqarpoq.

Nutaarsiassanittaaq pisiniarfinnut siunnersuisooqatigiit nutaat qanittukkut pilersinneqartut angusaat oqaluttuarineqarput. Suliaasa inerneri siulliit maanna pigineqalerput, KNI-llu nunatsinni pisiniarfiutaani suut nioqqutigineqarnissaannik kissaateqartoqarnersoq paasissallugu ajornannginnerulerpoq.

-Kalaallit Nunaata ilarujussuanut pisiortussagaanni pisisartut pilersuisullu ilisimasaqarfigilluarnissaat pisariaqarpoq. Minnerunngitsumillu nioqqutissanik, pitsaassutsinik, annertussutsinik akinillu aalajangersaaniarnermi. Illoqarfinni nunaqarfinnilu Pilersuisoqarfiusuni tamani pisiniarfinnut siunnersuisooqatigiinnik pilersitsisoqarneratigut pisisartut nioqqutissat suut Pilersuisumi nioqqutigineqarnissaannut siunnersueqataasarput, pisiortornermut pisortaq Kurt Lauritsen nassuiaavoq.

Nutaarsiassat allaaserisap ataani atuarsinnaavatit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq