Polaroid tallimanik ulloriannappoq

Kalaallit qitillutik isinnaartitsisut Polaroid-mik taaguutillit ippassaq Det Kongelige teaterimi isiginnaartitsimmata, isiginnaartitsinerup tungaatigut oqaluttuarisaanermi nutaarluinnarmik pisoqarpoq.

Isiginnaartitsinermi ilitsersuisoq Jo Strømgrens aviisimit politikenimit nersualaarneqarpoq issittumi inuuneq quujanartuliaralugu isiginnaartitsissusiarisimammagu.

- Isumaqarpunga isiginnaartitsissusiannguaq una nuannerluinnartuusoq, assorsuaq kalaallit qanoq ittuunerannik takutitsivoq.

Nuna kusanartoq tunuliaqutigaat taannali pisarnermisut nipaqanngilaq. Taavalu taassuma saniatigut assut aliikkusersorneqarluarpugut takutinneqarpoq sila anorlersoq issittoq arnat kusanartut. Taava angut kakkattoq takkuteriataarmat toqutsisoqariataarpoq, ataatsimut isigalugu tissinartorujussuuvoq. Suut tamarmik ataatsikkut takutinneqartutut ipput inuuneq toqu illarneq ilumoorsaarnerlu. Takorluulersinneqarpugullusooq taavani nunami isseqisumi taartumi susoqarpiarneranik, aviisip Politikenip isiginnaartitsisartunut isornartorsiuisartua Monna Dithmer unnersiorpoq.

Taanna aperineqarpoq, danskiulluni isiginnaartuulluni qanoq misiginarnersoq.

- Europamiorpalaarpoq ilitsersuisuammi Jo Strømgren nalunngilluarparput, isiginnaartitsineq qallunarneriartarpoq nutserissunneqarnerit pisarput, kalaallisulli paasisinnaanngikkaluarluta susoqarnera paasisinnaavarput, Monna Dithmer unnersiorpoq.

Taassuma aamma erinarsortoqarsimanera pikkugerpaloqaa. Tujorminartortarlunilu piviusulersaarutitaqarnerarlugu.

Aperineqarpoq naliliisartutut ulloriartaliissaguni qassinik ullorissanik ikkussissagaluarnersoq.

- Isiginnaartitsissusiaq kinaassuseqarpaloqimmat ullorissanik sisamanik tallimanilluunniit ikkussiffigissagaluarpara, Mona Dithmer oqarpoq.

Polaroid Danmarkimi takutinneqareeruni Savalimmiuni aamma takutinneqassaaq. Savalimmiuniit saamit nunaanni aamma takutinneqassaaq.