Polar Seafoodip politikerit akuleruteqqunngilai
Taama qisuariaateqarlutik tusagassiuutinut allagaqarput, Polar Seafood, Inatsisartunut ilaasortap aamma Qaasuitsup kommuniani borgmesterip tullersortaata Jess Svanep paragraf 37 naapertorlugu naalakkersuisunut apeqquteqarmat, aalisakkanik tulaassisussaatitaanermut malittarisassat allanngortinneqarneratigut Qasigiannguani aalisakkanik suliffissuarmut kinguneqarsimanera, aalisartut fabrikkimut aalajangersimasumut tulaassisussaatitaajunnaarnerisigut.
Naalakkersuisut akissuteqaataanni atuarneqarsinnavoq, malittarisassat allangortinneqarnerisigut aalisakkat Qasiannguanut tulaassorneqarneqartartut ikileriarsimasut tamatumalu kingunerigaa, ukiuunerani suliffissuarmi tamakkiisumik sulisoqarsinnaanani.
Polar Seafoodimit erseqqissaatigineqarpoq, politiikerit aalajangissanngikaat aalisartut fabrikkimut sorlermut tunisissanersut.
- Sulifinnik amerlanersunik pilersitsisoqarsinnaanngilaq fabrikkit arlaannik iluaqutissiinikkut, Polar Seafoodimi siulersuisuni siulittaasoq Henrik Leth tusagassiuutinut nalunaaruteqarluni taama allappoq.
Malittarisassat allanngortinneqarmata, Polar Seafoodip Aasianni fabrikkianut tunisat amerlanerulerput.
Polar Seafoodip qulakkeerlugu oqaatigaa, Qasigiannguani fabrikkimi sulisussarsiorniarneq sivisuumik ajornartorsiutaasimasoq tamatumalu kingunerisimagaa qaleralinnik qerisunik suliarineqanngitsunik nunatsinniit annissisoqartariaqarsimammat.
