Polar Seafood: -Unioqqutitsinngilagut!
Raajanik aalisapilunneq politiinit misissuivigineqareeraluartoq, suli suliaq naammasseqqajanngilaq.
Kilisaatit marluk aapparalugu kilisaat Nanoq Trawl – Polar Seafoodimit pigineqartoq, nunatsinni politi mesterimit pineqaatissinneqartussaajunnaarput taamaattorli inatsit maleruaqqullugu mianersoqqussummik nalunaarfigineqarlutik - tamannalu suliffeqarfiup Polar Seafoodip akuersaarumanngilaa.
Inatsimmillu maleruaaqqusissummik mianersoqquneqarneq isumaqartinneqarpoq aalisapiluttoqarneranik suliffeqarfik pisuutinneqartoq – erseqqissaatigineqarporli tamanna akiliisitsinerunani mianersoqqusinerinnaasoq.
- Tamanna ilutsinni eqqarsaatigeqqaassavarput, taama Polar Seafood-imi siulersuisut siulittaasuat Kjeld Holmstrup oqarpoq, nangipporlu:
Ajunnginneraaginnarneq ajornanngippallaaqaaq, taamatummi aalajangiisoqarsimanera akuerissagaluarutsigu taava pisuutitaaneq akuersaartussanngussavarput. Uagullu isumaqanngilluinnarpugut kukkussuteqarsimalluta – unaluunniit pisoq soqutaavallaanngitsutut isigineqaraluarpat, Keld Holmstrup oqarpoq.
