Polar Seafood Aasianni tunitsivimmik ammaaqqippoq

Jeremiassenip naalakkersuisumut apeqqutigaa Aasianni tunitsiveqarniarnikkut periarfissaqannginnera qanoq iliuuseqarfiginiarneraa, Lyberthillu aalisartut tunisassiortullu akornanni tamanna aaqqitassaanerarlugu ajornartorsiutaasut oqaaseqarfigiumasimanngilai. Taamaakkaluartoq aalisarnermut naalakkersuisoq Aasianni pigisaanilu aalisartunut nuannersumik nutaarsiassaqarpoq. Allamut atatillugu Polar Seafoodimik oqaloqateqarnermini ajornartorsiutaasoq ilanngullugu eqqartorneqarsimaavaat.

- Piffissaq misiliiffissaq aallartissaaq suanniarneq naammassippat, siullermillu septembarip qaammataata tungaanut ingerlassalluni. Tamatuma kingorna piffissaq misiliiffik nalilersorneqassaaq, paasinarsissappallu taamatut tunngavissaqartoq aaqqiineq suliffeqarfiup ingerlateqqissavaa, taamaalillunilu Aasianni aalisartut saarullinnik, suluppaakkanik, qeeqqanik qaleralinnillu tunisinissamut periarfissinneqassallutik. Neriuppunga aalisartut tunisassiortullu piffissami misiliiffiusumi suleqatigiinnermikkut aaqqiineq siunissami piujuartunngortissagaat, Karl Lyberth oqaluttuarpoq.