Polar Nuka misileraalluni Tunumi aalisarnialerpoq

NUKIK Seafoodip aalisariutaa, Polar Nuka, Kuummiuni orsersoreeruni avannamut ullaap tungaani aallassaaq, Tunumi ukiuni marlussunni tulliuttuni misileraalluni aalisarnissani aallartissallugu.

Polar Nuka-p toraagassaa tassaavoq Illoqqortoormiut kangerlussua, qaammatip aappaata affaani tullermi misileraaffigineqartussaq.

Aalisakkat, ilaatigut qalerallit, saarulliit suluppaakkallu tappavani nassaassaanersut paaserusunneqarpoq. Immami, 1.200 meteri angullugu itissusilimmi, qassutit ningittakkallu atorlugit misileraasoqassaaq.

Polar Nuka-mi inuttat aqqaniliussapput, naatsorsuutigineqarporlu Illoqqortoormiunut apuukkunik aalisartut kangerlummik ilisimannittut pingasut sisamalluunniit ikissasut. Aalisarnermi atortut, qassutit ningittakkallu qanoq atorneqartarnerannik ilinniaatigalutik, aalisakkat pisarineqartut qanoq tisaneqartarnissaannik inuttat taakku ilinniartinneqassapput, NUKIK Seafood-imi pisortaq Petrus Biilmann ilisimatitsivoq.

Polar Nuka Tasiilamut ukiaru uterpat, allat ikissapput, misileraanernut oktobarip tungaanut ilaassallutik.

Aalisakkat Tunumi ullumikkornit annerusumik inuussutissarsiutigineqalernissaat neriuutigigitsik, Petrus Biilmann Radioavisimut oqarpoq.