Polar Fish ammarneqarpoq

Saqqummersitsisut 50-it missaanniittut aalisarnermut atortunik, ilinniartitaanernut, aningaasanut tunngasunik siunnersuinernik sillimmasiinernullu tunngasunik nutaarsiassaqartitsinissaminnut ilitsersuinissaminnullu piareersimapput.

Sisimiuni aalisarnermut tunngasunik saqqummersitsineq Polar Fish ukioq allortarlugu ingerlanneqartarpoq ukiormannalu arfineq-aappassaannik ingerlanneqarluni.

- Saqqummersitsisut arlallit siornatigut peqataasareerput, qujanartumik aamma nutaanik takkuttoqarpoq, taassuma ersersiinnarpaa ajunngitsumik niuertarsimasut. Taama oqarpoq Qeqqata Kommuniani inuussutissarsiornermut siunnersuisoqatigiinni aqutsisoq Peter Evaldsen.

Taassuma peqataaniarlutik nalunaartut amerlassusaasa naammannerisigut aaqqissuussinerup piviusunngortinneqarnera nuannaarutigaa.

- Neriuutigaarput avataaniit neqerooruteqarlutik Kalaallit Nunaannukartut naammagisaminnik niersimassasut aammalu atuisut pisariaqartitaminnik pisisimassasut, Peter Evaldsen oqarpoq.

Saqqummersitsineq Nunarput tamakkerlugu pingaaruteqartoq, Peter Evaldsenip oqaatigaa.

- Nutaanik attavissarsiornermut atorluarneqartarpoq, tassami imminnut takoreerluni niueqatigiinneq oqinnerujussuusarami, Peter Evaldsen oqarpoq.

Qeqqata Kommuniani borgmesterip Hermann Berthelsenip Peter Evaldsen isumaqatigaa:

-Saqqummersitsineq kommunimut pingaartoujussuuvoq, aalisarneq pingaarnertut inuussutissarsiutigaarput, aamma saqqummersitsineq Qeqqata Kommunianut minnerunngitsumillu Sisimiunut pingaaruteqartorujussuulluni, Hermann Berthelsen oqarpoq.

Nunat assigiinngitsut saqqummersitsisut tassaapput Kalaallit Nunaat, Danmark, Savalimmiut, Island, Sverige, Norge aamma Skotland.