Polar Fish 2006 Sisimiuni
Nunatsinni aalisartut tuniniagassaminnik nunatsinni 2002-mili saqqummersitsisinnaasimanngeriarlutik, ukioq manna saqqummersitsisussanngorput.
Polar Fish 2006 Sisimiuni novembarip ulluisa 17-ianniit 19-iata tungaanut ingerlanneqassaaq, naalakkersuisullu siulittaasuata Hans Enoksenip saqqummersitsinissarsuaq ammartussaavaa.
Dansk Eksport Forening-ip, Sisimiut Kommuneata, Sisimiuni Inuussutissarsiornermut Siunnersuisooqatigiit, Aalborg Kongres & Kulturcenterillu suleqatigiinnerisigut Polar Fish 2006 piviusunngortinneqarsinnaasimavoq.
- Nuannaarutigaara taamatut saqqummersitsisoqarsinnaammat. Nunatsinnut pingaartumillu Sisimiut Kommuneannut tamanna pingaaruteqartorujussuuvoq, nunatta Ålborgillu akornanni suleqatigiilluarneq naqissuserneqarmat, naalakkersuisut siulittaasuat Hans Enoksen oqarpoq.
Danmarkimi aalisartut tuniniagassaminnik saqqummersitsinersuata, DanFish-ip, Aalborg Kongres & Kulturcenterip aaqqissugarisarpaa, pisortaallu Ernst Trillingsgaardip Sisimiullu borgmesteriata Hermann Berthelsenip atsioqatigiinnermikkut Polar Fish 2006 piviusunngorpoq.