Polar Fish 2006 ammaannaleqaaq
Aalisarnermik takutitsineq, Polar Fish 2006, Sisimiuni tallimanngornermi ammarneqassaaq.
Sisimiuni tallimassaa aalisarnermik takutitsisoqalerpoq, ukioq mannalu takutitsineq takutitsinernit tamanit annerpaavoq.
Aalisarnermut tunngassutilinnik suliaqartut 66-it Kalaallit Nunaanneersut, Canadameersut, Islandimeersut, Savalimmiuneersut, Norgemeersut, Tuluit Nunaanneersut Danmarkimeersullu Sisimiut Timersortarfianni takutitsinermi 125-nik peqataatitaqarput.
- Maani illoqarfitsinni aaqqissuussinerit taamattut sungiusimavagut, Sisimiuni borgmesteri, qilanaartoq, Hermann Berthelsen, oqarpoq.
Aaqqissuussineq Sisimiuni aningaasaqarneramut iluaqutaassasoq borgmesterip ilisimanerarpaa:
- Periarfissanik assigiinngitsunik atortunillu assigiinngitsunik ulluinnarni takusanngisaminnik aalisartut takunnissinnaanerat annertuneruleruni, taava aalisarnermut atortorisinnaasaat pitsaanerujartuaarsinnaammat neriuutigilluinnarpara naatsorsuutigalugulu atorluassagaat, Hermann Berthelsen oqarpoq.
- Sinerissap qanittuani aalisartut aalisarnermik takutitsisarneq paasiartulerpaat, Sisimiut kommuneani inuussutissarsiuteqarnermut pisortaq, Jørgen Peter Labansen, oqarpoq.
Aalisarnermik takutitsineq, Polarfish 2006, sapaatiuppat naammassissaaq.