VIDEO Polar Circle Marathon sapaatit-akunnerata naanerani ingerlanneqassaaq

Arpatsitsinemi 176-it peqataassapput. Arpatsitsinermik aaqqissuisuusut Albatros Adventure Marathons tusagassiorfinnut nalunaaruteqarlutik taama ilisimatitsipput.

Arpatsitsineq nuna arpaffigineqartussaq silallu nillissusia eqqarsaatigalugit sakkortunerpaat ilagigunarpaat. Kangerlussuarmilu sila qujanartumik unerisimasuuvoq anorlerujussuartarani nittaarujussuartaranilu, Lars Fyhr, Albatros Adventure Marathonsimi pisortaq taama oqarpoq.

Arpannerup kilometerii siulliit Sermersuarmi pissapput sapaatit-akunneratalu naanerani silassamik ilimasaarut naapertorlugu arfininngorpat maratoni tamakkiisoq ingerlanneqalerpat -15 °C-inik ississaaq sapaatiuppallu maratonip affaanik arpattoqalerpat -10 °C-inik ississalluni.

Nunanit assigiinngitsorpassuarnit peqataasut

Kangerlussuarmiipput aamma angalasut aqutsisui, arpatsitsinermi aqutsisut, nakorsat, isiginnaariat, assiliisartut kiisalu Albatros Arctic Circlemi sulisut (siornatigut World of Greenland Arctic Circlemik taaguuteqartoq), tassanilu pisortaq Jørgen Larsen ima oqaluttuarpoq:

- Arpatsitsinermik aaqqissuusseqataanerput pilersaarusiornerullu iluatsinniarnissaa nuannareqaarput. Kangerlussuaq aaqqissuussinernut taama ittunut tulluavippoq aamma Kangerlussuup Kalaallit Nunaanni misigisassarsiorfittut siuttuulernissaanik ineriartortitsinitsinnut naapertuuppoq.

Arpannermut ukioq manna peqataasussat nunanit ukunanngaanneersuupput. Kalaallit Nunaat, Antigua & Barbuda, Australia, Belgia, Brasilia, Canada, Danmark, Frankrig, Gibraltar, Holland, Italia, Kina, Mexico, New Zealand, Norge, Schweiz, Spania, Tuluit Nunaat, Sverige, Swaziland, Sydafrika, Tjekkiet, Tyskland, USA aamma Østrig.

Paasissutissanik amerlanerusut nittartakkami uani pissarisineqarsinnaapput: polar-circle-marathon.com.