Plutoniummeqarnera peqqiilliornermut peqqutaanerarpaat

- Aalajangiineq nuannaarutigaara, timmisartup nakkarnerani plutoniummimik minguttitsineq pissutigalugu saleeqataasimasut kinguaavisalu tamanna nappaateqaatigalugu misigisarsimammassuk, Qanaap Kommuneani borgmesteriusimasoq, Jens Danielsen oqarpoq.

Jens Danielsen aamma Hans Karlsen peqatigalugu peqqissutsimik misissuinissamut sulissuteqartuupput tamannalu piviusunngortussanngorpoq.

Timmisartorsuullu nakkarneranit peqqinnikkut kingunerluutit qularineqanngillat.

- Inuit gigtipalaamik, amerlunnermik kræftemillu nappaateqartarput. Arlallit niumikkut talimikkullu itisuunik marniliuuttunik ikeqarput.

Timmisartoq atominik usisoq Pituffiup eqqaani 1968-mi nakkarmat Narsaarsuup tungaanut anorlersimavoq. Tassa Moriusap akinnguanut. Misissuinerullu paasinarsisereerpaa tamaani nuna suli plutoniumeqartoq. Taamaammat moriusarmiut narsaarsummiittartullu kinguaavi salliulugit misisuiffigineqartariaqarput, ilisimaneqarmat plutoniummi kinguaariinni arlalinni ajoqusiisinnaasoq.

-Ilisimasaq tamanna innuttaasunit toqqissisimananngissutigineqarmat innuttaasut peqqissutsimut misissorneqarnissaat anguniarparput, Jens Danielsen oqarpoq.

Ilanngutassiaq tassunga tunngasoq Unnugu Qanoruukkut takujuk.