PlayStation2 tunissutissatut pisiarineqarnerpaavoq

Juullimi tunissutisiassat ukioq manna akisujaajupput, tamanna paasinarsivoq pisiniarfiit tusarniaavigigatsigit. Nuannarineqarnerpaanullu ilaapput qarasaasianut spil-it. Aliikkutaalluarineqartartorlu PlayStation2 assut tunisaasimavoq.

Nuummilu pisiniarfimmi Nota Bene-mi sulisoq, Karolina Frederiksen unnersiorpoq CD-t ilaallu aamma nuannarineqaqisut:

- CD-t oqarasuaatillu angallattakkat siuariarput, kisiannili aamma mersorfiit assiliiviillu pisiarineqarnerpaanut ilaallutik, Karolina Frederiksen unnersiorpoq.

Pisiniartorpassuillu akornanni ilaat ataaseq naapitarput, imminut tunissutisiassaminik pisisoq naammattoorparput:

- Juullisioqatissakka assilisaqattaarniassagakkit assiliivik pisiaraara, tassa imaappoq allamut tunissutaanani uannut tunissutaavoq, juullisiussamaaqisoq Jakob Frederiksen oqarpoq.

Aammattaaq Nuummi Imercomi juullip qaammataani aningaasaat kaaviiaartitat malunnaatilimmik amerleriarsimapput, annertuumillu tuniniakkat ilagaat juullimut pinnersaatit:

- Maluginiakkama ilagaat juullimut pinnersaatit Georg Jensenimeersut nungujaarnerat. Kisianni innaallagissamik atortut, igaffimmi atortut PlayStationillu assut ingerlalluarput, Imercomi ulluinnarni ingerlatsisoq Karen Berthelsen Møller oqarpoq.

Sisimiuni Imercomi tunissutisiassanik pisiniat aamma imaaginnavissimapput, tasssanissaaq PlayStation2 nuannarineqarnerpaanut ilaavoq.