Plastikkimik mingutsitsineq Issittup imartaanut siaruaattoq
Immat plastikinik mingutsinneqarsimasut Issittup imartaani maanna aamma takussaalersimasut ilisimatuut nunanit tamalaaneersut paasisimavaat.
Imartaq Framsundet, Svalbardip Nunattalu akornanniittoq 2012-imi misissuiffigineqarsimavoq. Ilisimatuut Tysklandimeersut Belgiameersullu imartaq 5600 kilometerinik isorartutigisoq misissuiffigigamikku plastikkeqarfissuit 31-t siumorsimagaat, nutaarsiassaqartitsiviup DPA-p allaaseraa.
Ajornartorsiulli annertunerusinnaasoq ilisimatuut oqaatigaat, misissuinermilu inernerit ilisimatuussutsikkut atuagassiami Polar Biologymi saqqummersinneqarlutik.
Plastikkit qanoq ilillutik Nunatta Svalbardillu akornannut anngussimanersut ilisimaqqissaanngilaat, ilisimatuulli ilaata Melanie Bergmannip oqaatigaa plastikkit Norgep Ruslandillu avannamut sineriaanit Barentip Imartaaneersuusimasinnaassasut, tamaanimi plastikkit eqimattakkuutaat siumorneqakkajummata.
Immallu sikuata silap pissusiata allanngoriartornerata kingunerisaanik aakkiartuinnarnera pissutaalluni tamaani aamma angallattoqarnerulernera aamma pissutaasinnaasoq ilisimatuut oqaatigaat.
Plastikkinik Issittup Imartaani mingutsitsineq pingaartumik timmissanik eqquisinnaavoq, plastikkillu timmisat eqalussuillu aqajaruini nassaarineqartalereerput.
