Qasilitsunik seqqartaatinik atuisoqalernissaa isornartorsiorneqartoq
Pineqatissinneqarsimasunut inissiisarfinni nakkutilliisut aqukkuminaatsut naalatsinassinnaajumallugit qasilitsunik seqqartaatinik atortoqalernissaannik pilersaaruteqarneq, Inuit Pisinnaatitaaffii pillugit Kalaallit Nunaanni Siunnersuisoqatigiinnit isornartorsiorneqarpoq, aviisi AG ullumi saqqummersoq taama allaaserisaqarpoq.
-Pissaanermik atuinissamut sakkutut sakkortoorujussuuvoq, Kalalalit Nunaanni pinerluuteqarsimasunut inissiisarfiini naapertuutinngitsoq, siunnersuisoqatigiit taama oqarput.
Danmark qasilitsunik seqqartaatit 2011-mi atorneqalerput, taamattumillu inuit pisinnaatitaaffi pillugit siunnersuisoqatigiinnit Danmarkimi parnaarussat qasilitsunik seqqartaammik seqqartarfigisitissimasunik apersuipput, apersorneqartullu oqaluttuarput allaanngiivissoq imermik qalattumik kinnakkut kuineqarluni allaat ipilersutut misiginangajalluni.
Peqqinnissaq pillugu aqutsisoqarfimmit nalunaarusiami oqaatigineqarpoq qasilitsut isikkut tassanngaannaq noqartoornermik tamatumalu malitsigisaanik isigisaarunnermik minutsit 45-it angullugit sivisussuseqarsinnaasumik.
Peqqinnissaq pillugu aqutsisoqarfimmit qasilitsunik seqqartaatit inini matoqqasuni atorneqartariaqanngitsut innersuussutigaat, aviisi AG taama allaaserisaqarpoq.
