Piviusulersaarutit pikkorissaassutigineqarput

Piviusunik tunngavilinnik dokumentarinik TV-mut aallakaatitassiornermik pikkorissaaneq Nuummi Katuami ullumi aallartinneqassaaq. Aallakaatitassiat qanoq ilusileraanni qanorlu tuniniaraanni nunanut allanut siammarnerusinnaanersut ilaatigut pikkorissaassutisineqassapput.

Nunani Avannarlerni Piorsarsimassutsikkut Attaveqaammi NAPA-mi suliamik pilersaarusiornermut ingerlatsisoq Boas Møller isumalluarpoq.

-Tassa ullumi sisamanngornermi aqagulu tallimanngornermi ullaakkut qulininngaanniit tallimat qeqqata tungaanut Ålandiminngaanniit dokumentarinik piviusorpalaartunik aallakaatitassiortartoq tamaanga tikisitarput pikkorissaalissaaq. Iluatinnaateqartorujussuugami nunatsinninngaanneersut taamatut filmiliortartut eqqarsaatigalugit eqqortunik aqqutissaannik ikiorsinnaassagamigit, immaqa kalaaleq Tuominenitut iliorsinnaanngussaaq, nunani avannarlerni isiginnaartorpassuaqalersinnaasumik. Boas Møller oqarpoq.

Pikkorissarneq, NAPA-mit aaqqissuunneqartoq Jonas Tuominen-imit ingerlanneqassaaq, taanna siornatigut Kalaallit Nunaanneereersimavoq, piviusulersaarut ”Ø til Ø” immiukkiartorlugu. Tuominen pikkorissaasutut piukkunneqarsimavoq aallakaatitassiarisartagaasa tv-eqarfissuarnut tunineqarsinaasarneri pissutigalugit.

Jonas Touminen-ip qulequtaraa: Qanoq ililluni Namminersornerullutik Oqartussaqarfiusut TV-kkut piviusulersaarusiat Ålandimi, Kalaallit Nunaanni Savamiunilu suliat TV-qarfissuarnut tununiarneqarsinnaappat?

TV-qarfissuartut taaneqartut tassaasinnaapput Danmarks Radio aamma Sveriges Television.

Pikkorissaasoqareerpat Katuap inersuami Jonas Tuominenip tv-kkut piviusulersaarusiaasa ilai sisamat sapaatiuppat apriilip naggataani tamanit takuniarneqarsinnaassapput.