Piumasaqaatitik naammassineqarsimanerarpaat

Inuit Ataqatigiit Arctic Umiaq Linep tuniniarneqarneranut atatillugu piumasaqaatinik nutaanik saqqummiussigaluarnertik nalunaaquttap akunneri ikittuinnaat atorlugit tunuartippaat, taamaalillutillu Arctic Travel Groupimut tunisinissaq Aningaasaqarnermut Ataatsimiititaliami akueralugu taaseqataaffigalugu.

Inuit Ataqatigiit siulittaasuat Josef Motzfeldt nassuiaavoq, Aningaasaqarnermut Ataatsimiititaliap naalakkersuisuugallartut siulittaasuannut Hans Enoksenimut apeqquteqaataasa akissutai suli takunagit piumasaqaateqarsimallutik. Nunaqarfiit angisuut sisamat illoqarfiillu Upernaviup Qeqertarsuullu tikinneqartarnissaat IA-p piumasarisimavaa.

- Hans Enoksenilli akissutaani erseqqissumik allassimavoq, nunaqarfiit illoqarfiillu pineqartut KNI-mit Pilersuisumillu kiffartuunneqassasut. Tamannali piumasaqaateqarnitta nalaani aningaasaqarnermut ataatsimiititaliami ilaasortaatitatta ilisimasimanngilaa, akissutillu tigoriaramigit ajornaquteqanngitsumik akuerseqataasinnaalersimalluni. Josef Motzfeldt taama nassuiaavoq.

Inatsisartut aningaasaqarnermut ataatsimiititaliaani IA sinnerlugu Aqqalukasik Kanuthsen ilaasortaavoq, oqaaseqartinniaraluaratsiguli iluatsinngilarput.