Piumasaqaateqarnissamut sapiissuseqartariaqarpugut
Akisussaasunik tikkuartuiniartoqarpoq, Meeqqalli Siunnersuisooqativii naapertussagaanni, tamanna aqqutissaanngilaq. Ilinniartitaanerit pitsaanerusumik angusaqarfiussappata, ullumikkornit annertunerusunik piumasaqaateqartoqartariaqarpoq. Atuartut, angajoqqaat, ilinniartitsisut inuiaqatigiillu piumasaqaateqarfigineqartariaqarput.
-Kinguneqartussamik isumaliornissarput ataatsimoorussamillu suliassatut isiginiarnissaa pingaaruteqarpoq, ilinniartitsisummi, angajoqqaat meeqqallu kisimik pisuunngillat. Issiaqatigiilluta aaqqiissutissamik nassaarniartariaqarpugut. Meeqqat inuiaqatigiinni eqeersimaartumik peqataanissaminnut periarfissartik annaasinnaavaat. Tamannalu ajornartorsiutaavoq angisuupilussuaq aaqqinniartariaqagarput, meeqqat oqaaseqartartuat Aaja Chemnitz Larsen oqarpoq.
Meeqqat Siunnersuisooqatigiivini ilaasortamit William Kriegelimit ilalerneqarpoq, taannami ilinniartitaanermut tunngatillugu annertuumik ilisimasaqartuuvoq. Taanna isumaqarpoq meeqqat atuarfiata pitsaasumik ingerlanissaanut killiliussat pigineqareersut, taamatuttaalu kajuminneq pigineqareersoq. Taamaakkaluartoq pissusissamisut ingerlanngilaq.
-Oqallisigineqarnissaa pisariaqartipparput. Suunngitsuaqqat aallarniutigisinnaavagut, soorlu assersuutigalugu ilinniakkerisarneq. Atuartorpassuit ilinniagassinneqarnerneqarpoq ajorput, suliarinavianngimmatigik. Nunarput ilinniartitaanikkut nunanut allanut nallersuussinnaaniassappat anguniakkat piumasaqaatillu qaffasinnerunissaat pisariaqarluinnarpoq, ilaatigut angerlarsimaffiit akuutinnerisigut - aamma ilinniagassanut tunngatillugu. Piumasaqaateqarnissatsinnut sapiissuseqarnerusariaqarpugut, William Kriegel naqissusiivoq.
Illuatungeriit attuumassuteqartut piumasaqaateqarfigineri ilutigalugu aamma piginnaaneqarfiit oqallisiginissaannut sapiissuseqartariaqarpugut. Atuartut immikkut pisariaqartitsisut immikkut sammineqarnerusariaqarput, aamma immikkut atuartitsisarneq politikkikkut eqqumaffigineqarnerusariaqarpoq. Aatsaat taamaaliornikkut meeqqat atuarfiat atuartunik ilinniartitaanikkut ingerlaqqinnissamut piareersimasunik atuartitsisinnaasoq angusinnaavarput.
-Immikkut pisariaqartitsisunik ilinniartitsisussanik pisariaqartitsinerput ersarittupilussuuvoq, meeqqallu assigiinngitsuunerat, assigiinngitsunillu pisariaqartitsinerat eqqumaffiginngikkutsigu sapangeratarsinnaavagut. Meeqqat immikkut pisariaqartitsisut eqqumaffiginissaat pingaaruteqarpoq, Meeqqat Siunnersuisooqatigiivini ilaasortaq immikkullu atuartitsinermi ilinniartitsisoq Johan Reimer oqarpoq.