Piumasaq: Inuit Piginnaatitaaffii pillugit Siunnersuisooqatigiit Aasianni pisoq suliarisariaqarpaat

Aasiaat pinerluuteqarsimasunut inissiisarfiani, niviarsiaqqap 17-inik ukiullit alianaqisumik immunut toqunnera pillugu suliaq, Inuit Piginnaatitaaffii pillugit siunnersuisooqatigiissitap suliarisariaqarluarpaa. Taama isumaqarpoq Inuit Ataqatigiit sinnerlugit Inatsisartunut qinigassanngortittoq, Nikoline Ziemer.
marsip 07-at 2013 11:15

Inuusuttut pinerluuteqartartut eqqarsaatigalugit taakkununnga inissiisarfiit naleqquttut kommuninit atorneqartarnersut imaluunniit atorneqartarsimanersut suliakkiissutip aallaavigaa. Qallunaat pinerluttulerinermut inatsisaat Nunatsinni atorsinnaaneq ajornerat aamma suliakkiummut ilaavoq.

Inuit piginnaatitaaffi pillugit siunersuisooqatigiissitap, qanittukkut pilersinneqartup suliassaasa siulliit ilaannik, Inuit Ataqatigiit Inatsisartunut qineqqusaartuisa ilaat, Nikoline Ziemer suliakkiivoq.

Aasianni pineqaatissinneqarsimasut inissiisarfianni, niviarsiaqqap 17-inik ukiullip imminut toqunnerata kingorna, Nikoline Ziemer suliakkiivoq.

Radioaviisimi qanittukkut oqaluttuaraarput, niviarsiaqqamik sullissinermut attuumassuteqartut arlaqartut oaatigigaat, niviarsiaraq 17-inik ukiulik pineqaatissinneqarsuimasunut inissiisarfimmiisinneqartariaqarsimanngikkaluartoq.

- Ajornartorsiutaavoq kommunit inuusuttunut sullissisinnaaneri amigarmata sakkussaqaratillu. Kommunit pisussaaffiisa naammassineqarsinnaanerat eqqarsaatigalugu, Inatsisartutigoortumik tamanna aaqqinneqartariaqarsoraara. Kommunilli suliniutigisinnaasaannik sinaakkutissiisoqaqqaartariaqarpoq, Nikoline Ziemer oqarpoq.

Oqartussat pinerluttulerinermut inatsinik atortitsisussaatitaasarnissaminnik soqutigisaqannginnerisa takutikkaa, niviarsiaraq inersimasut pinerluuteqarsimasut akornannut inissinneqarsimanera, Nikoline Ziemer isumaqarpoq.

Pisup taassuma takutiinnarpaa, qallunaat pinertullulerinermut inatsisaat Nunatsinni atorsinnaannginnerinut, Nikoline Ziemer oqarpoq nangillunilu oqaatigalugu, suliaq tamanna Inuit piginnaatitaaffii pillugu siunenrsuisooqatigiissimaut suliassanngortinneqartariaqartoq.

Inuusuttut inuuniarnermikkut ajornartorsiuteqartut pinerlunniarnermullu qanittut eqqarsaatigalugit, erngiinnaartumik taakkununnga qanoq iluuseqarsinnaanissap nukittorsarneqarnissaanut, qallunaat pinerluttulerinermut inatsisaanni, normu 469-imi 2001-meerumilu periarfissaqareersoq, Nikoline Ziemer oqarpoq.

- Inuit piginnaatitaaffii pillugit siunenrsuisootatigiissitap suliaq manna tigusariaqaraluarpaa, tassami inatsisitigut tamanna tunngavissaqeerpoq sinaakkusersugaareerlunilu aamma inuit atugarisaat pillugit inatsimmi. Kalaallit Nunaata inatsit sumiginnarpaa, taamaattumillu piaarnerpaamik suliaq aallartinneqartariaqarsoraara.

Inuit Ataqatigiit qinigassanngortitaat, Nikoline Ziemer taama oqarpoq.

Inuit sullinneqarnerannut inatsimmi allassimavoq, inuusuttut pinerluuteqarnerisa kingorna tigusarineqarnerannit, ullut arfineq marluk qaangiutinnginneranni kommunit pisussaasut inuusuttoq pillugu pilersaarusiornissaat.