Piumaneqarnerujussua ajutoornissamut qanillisaataavoq
Imaannarmi uuliasiorluni qillerisoqartarpoq, immani itisoorujussuarni, immap qaavaniit putut qillikkat sanimut sammisut meterinik 1.000-ilikkuutaanik ititigisumiittut qillerneqartarput nunanilu issittuni qilleriviit ikkussorneqartarlutik, taakkunanilu siku immikkut ulorianartorsiortitsisinnaalluni.
Uuliasiortitseqatigiiffissuit uuliamik qalluinermi teknikkikkut atortut ineriartortinnissaannut amerlasoorparujussuarnik aningaasaliisarput, uuliasiornerulli ajutoorsinnaaneranut atugassat amerlagisassaanatik.
Mexicop kangerliumanersuani uuliamik maqisoornersuarmi annertoqisumi paasineqarpoq ukiut kingulliit 20-t ingerlaneranni atortut imatorsuaq pitsanngoriarsimanngitsut. Atortut tassaapput assiaqusersuutit puttasut, maskiinat atorlugit katersuissutit immaqalu kemii atorlugu uuliamik siaruartitseriaaseq.
Qallunaat ilisimatuut immikkullu paasisimasallit imaani uuliamik mingutsitsinermik akiuiniarnermi periaatsinik pitsaanerusunngortitsisinnaasut nassaariniarnerat ulloq manna tikillugu iluatsissimanngilaq.
Taamatut ilisimatusarneq kimilluunniit aningaasaliiffigiumaneqanngilaq suna arlaat akilersinnaasumik ingerlalersinnagu, mannalu tikillugu uuliamik qalluinissaq aningaasallu sammineqarnerupput, imaanngitsoq ajutoorsinnaanerit qanorluunniit ittut.
USA-mi American Petroleum Institute oqarpoq assiaqusersuutit puttasut katersueriaaserlu pitsaanerulersinniarlugit sullissivik taanna annertuumik misileraasoq. Tamannali asuli oqalunnerussaaq, uuliaqarfik immap qaavaniit 1500 meterisut ititigisumiittoq putusuussappat.
Siorna aasakkut Timorip imartaani taamaangajattumik mingutsitsisoqarmat sapaatit akunneri qulit qaangiuttulli aatsaat uuliaqarfik nakkutigineqarsinnaalerpoq. Mexicop kangerliumanersuani uuliaqarfik manna tikillugu sapaatit akunnerini pingasuugallartuni putusooqqavoq, DR tusagassiivoq.
