Pituffiup eqqaani qinngornernik ulorianartoqarpoq
Nunami malunnartumik qinngornernik ulorianartoqartoq uuttorneqarsinnaavoq, inunnulli ulorianarsinnaanera suli oqaatigineqarsinnaanngitsoq, Risømi ilisimatuutut misissuisartoq, Sven Nielsen oqarpoq. Sven Nielsen nakkarfiup eqqaani 2003-mi misissueqataanikuusoq oqarpoq.
Timmisartup nakkarfiata eqqaani nunap qinngornernik ulorianartunik mingutsinneqarsimanera ilimagisatsinnit annertuneruvoq. Sumiiffiit ilaanni sakkortuumik ulorianartunik qinngorneqarpoq. Takorloorparput mingutsineqarsimasup ilaa teqqarsimassasoq upernaakkullu aputip aannerani nunamut millugussimalluni. Taamaammat sumiiffinni assigiinngitsuni nuna annertunerusumik mingutsinneqarsimasoq maanna nassaassaalluni.
Nunap ilaani tamaani inunnut angalasunut mingutsitsineq ajoqutaasinnaassaaq ulorianavissortutut oqaatigineqarsinnaanngikkaluarluni. Nunami tamaani plutomiummeqarnera timmisartup nakkarneranit pivoq. Plutoniummilu teqqartoq inuit tamaani angalasut najuukkunikku ulorianarsinnaavoq. Taamaammat misissuinitsinni silaannaap ulorianartunik pujoralaqarnera sammisimavarput. Nunamiillu mingutsinneqarsimasumit pujoralaat qinngornernik ulorianartunik akullit teqqarsinnaanerat, taamaalillutillu inunnit uumasunillu najuunneqarsinnaanerat assortorneqarsinnaanngilaq. Tassa tamanna maannakkut misissuinitsinni qitiutipparput. Timmisartup nakkarfia, Narsaarsuk siornatigut nunaqarfiuvoq maannakullu piniariartarfiulluni, aamma tamassumap kujatinguani umimmanniartoqartarpoq, taamaammat tamaani mingutsinneqarsimasumik mangiarlutillu najuussuisunik uumasunik nerisaqarneq ulorianaateqarsinnaanersoq sukumiisumik misissorneqartariaqarpoq, ilisimatooq Risømi atorfilik, Narsaarsummi misissueqataasartoq, Sven Nielsen oqarpoq.
Risømiit maanna misissuinerit inerneri ukiup matuma ingerlanerani saqqummiunneqarsinnaassasut Sven Nielsenip oqaatigaa.
