Pituffimmut paasissutissat suli utaqqineqarput
Pituffimmi timmisartorsuup qaartartumik usisup januaarip 21-ani 1968-imi nakkarnera pillugu paasissutissanik Danmarkimi naalakkersuisut sooq ulloq manna tikillugu tunniussisimannginnersut, Dansk Folkepartip illersornissaq pillugu oqaaseqartartuata Hans Kristian Skibby-p statsministerimut Anders Fogh Rasmussenimut apeqquteqaatigaa.
Europa-parlamentip Danmarkimi naalakkersuisut qaammatialuit matuma siornatigut paasissutissanik uppernarsaatinik tunniusseqqullugit saaffigisimavaa, ulloq mannali tikillugu suli tunniussisoqarsimanngilaq.
Pituffimmi qinngornernik ulorianartunik eqqugaasimasut peqatigiiffianni ilaasortat pisimasut pillugit erseqqinnerusumik paasissutissinneqarnissartik suli utaqqivaat.
Timmisartorsuaq Pituffiup eqqaanut 1968-imi nakkarmat sermimik apummillu assaannarmik piiaasitsisoqarsimavoq, qinngornerit ulorianartut peerniarlugit.
Pituffimmi sulisimasut untritillit kingornatigut napparsimalersimapput, arlallillu maannamut toqusimallutik. Pisimasulli tamavimmik ulloq manna tikillugu saqqummiunneqarsimanngillat, naak danskit naalagaaffiat Pituffimmi sulisartunut tamanut 1995-imi 50.000 koruuninik taarsiissuteqarsimagaluartoq.
