Pituffimmiut ilarput

Pituffimmi innuttaasut sinniisaasa paasiuminaatsippaat sooq Pituffimmiut pinnagit Qaanaarmiulli kisiisa Narsaarsummi mingutitsineq pillugu paasisitsiniaavigineqarsimanersut.

Sapaatip-akunnialui matuma siorna Naalakkersuisunut siulittaasuugallartup Hans Enoksenip aammalu Peqqissutsimut naalakkersuisuugallartup Asii Chemnitz Naruppip Qaanaami innuttaasut Narsaarsummi mingutitsisoqarsimanera pillugu paasititsiniaassutigaat. Taama paasisitsiniaanermi ilisimatusarnikkut sullissiviup RISØ-p nalunaarusiarisimasaa tunngavigineqarpoq.

Nalunaarusiarlu taanna Narsaarsuup eqqaani qinngornernik ulorianartunik mingutitsisoqarsimaneranik uppernarsaasuuvoq.

Pituffimmi innuttaasut sinnerlugit Jørgen Wegeberg allappoq paasisitsiniaajartortut aamma Pituffiliarsimasariaqaraluartut, taannalu aperaarput sooq taama isumaqarnersoq.

- Hans Enokseni Qaanaaliarluni Qaanaarmiunut paasisitsiniaajartulersoq tusaratsigu assut nuannaatsassimagaluarpugut. Isumaqarlutalu taama pingaaruteqartigisoq tassalu qinngornerit navianartut pineqartillugit aamma Pituffimmiut orninneqarsimasariaqaraluartut, tassami Pituffik mingutitsiviusumut qaninnerpaajummat, taama radio aviismut oqarpoq, Pituffimmi innuttaasut sinniisaasa allattaat Jørgen Wegeberg

Taanna aperaarput Pituffimmiut Qaanaaliaannarsimasinnaannginnersut.

- Taamaaliornissatsinnut periarfissaqanngiivippugut, tassami qulimiguulik ataasiinnaq Pituffimmiit Qaanaaliartarpoq, innuttaasorlu ataaseq siumut utimullu nammineerluni akiliuteqartariaqassalluni. Akikinnerujussuussagaluarpoq Hans Enokseni Pituffiliaannarsimagaluarpat, Jørgen Wegeberg oqarpoq.

Taanna nangilluni nassuiaavoq Pituffimmiut minnerpaamilluunniit mingutitsineq pillugu paasisitsiniaavigiartorneqarsimanngitsut. Oktobarillu aallartisimalernerani tusaramikku Qaanaami paasisitsiniaasoqartussanngortoq piaartumik Namminersornerullutik Oqartussanut allagaqarsimapput, ilaatigut allallutik inoqarfinnut taakkununnga marlunnut tamanna immikkoortitsinerunerarlugu.

- Oktobarip qulinganili allagaqarpugut ulloq mannalu tikillugu akineqarsimanngilagut, Jørgen Wegerberg oqarpoq.

Taanna suli akineqarnissaminik neriuppoq.

Pituffimmi innuttaasut naammagittaalliutaannut Naalakkersuisuugallartut siulittaasuat Hans Enoksen aatsaarluinnaq akissuteqarluni allappoq, Qaanaaliarnerminni Pituffimmut aqqusaarsinnaasimanatik. Pituffimmiulli mingutsitsineq pillugu paasisitsiniaavigineqarnissaat Naalakkersuisut kissaatigigaat, tamannali Inatsisartunut qinersisoqareernerani aatsaat pisinnaassasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat