Pituffimmi sakkutooqarfiup angissusia naluarput
Pituffimmi sakkutooqarfiup annertussusaa isertuunneqarpoq tamannalu iluanngitsumik kinguneqarsinnaavoq, Inatsisileritooq taama naliliivoq.
Danmark-ip paasissutissiissutigerusunngilaa, Pituffimmi sakkutooqarfik qanoq angitiginersoq tamannalu ajornartorsiutaangaatsialersinnaavoq, taama isumaqarpoq, inatsisileritooq, Nicholas Symes.
2001-imi Greenpeacermiut marluk Pituffimmi sakkutooqarfimmut iseriaraluarput, sulili isinngitsut tigusarineqarlutik, tamarmillu 5000 kr.-nik akiligassinneqarput iserfigeqqusaanngitsumut iseriaraluarnertik pissutigalug.
Ajornartorsiullu tassaavoq, Danmark-ip USA-llu oqaatigerusunngimmassuk, Pituffimmi sakkutooqarfiup killeqarfii sumut killeqarnersut. Taamaalillutik uumasunik illersuiniaqatigiit nalusimavaat sakkutooqarfiup iluanut pisimanerlutik taamaattumillu akiligassiissutit atorunnaarsinneqartariaqartut.
Taamatut piumasaqaateqarneq inuit taakkua pingasut illersorniarlugit inatsisilerituup Nicholas Symes-ip Europa-miut inuit pillugit naligiissitaanissamut eqqartuussivissuanut suliassanngortissimavaa, ullumikkulli eqqartuussivissuup aalajangiinermini Greenpeacermiut akiliisussanngortippai.
Suliap suliarineqarnerani inatsisilerituup Nicholas Symes-ip paasiniartuarsimagaluarpaa, Thule-p sakkutooqarfiata killeqarfia sumut killeqarnersoq! tamannali oqaatigiumaneqarsimanngilaq, tamannalu ajornartorsiutaasutut isumaqarfiginerarpaa.
- Tamatuma paasilluarnissaa pingaaruteqarpoq. Siullermik paaserusunnarpoq sakkutooqarfik qanorpiaq angissuseqarnersoq. Aappassaatullu ernummatigisarput tassaavoq Amerikamiut igitassanik pinngortitamut qimatsisimasinnaanissaat. Tassami igitassanik igitsiniarunik sakkutooqarfiup iluaniittussaammata. Taamaattumik sakkutooqarfiup annertussusaa paaserusunnarpoq, taamaalilluta sakkutooqarfimmi eqqagassanut tunngasut misissorluarsinnaaniassagutsigik, Nicholas Symes oqarpoq.
Akerliussutimik takutitsiniartut inuit pingasut Greenpeace-meersut sakkutooqarfimmut iserniarsimagaluarput, sakkutooqarfik amerikamiunit qaartartunut igeriuttakkanut missil-inut illersuusiatut atorniarneqarnera akerliuffiginiarlugu.
