Pituffimmi qinngussualiineq ulloriarsiornermik soqutiginnilersitsissasoq
Ilinniartitaanermut ilisimatusarnermullu naalakkersuisoqarfik tusagassiorfinnut nalunaaruteqarluni taama ilisimatitsivoq.
Ulloriarsiorfik Smithsonian Astrophysical Observatory, USA-mi Harvard Universityp ataaniittoq, amerikamiut Pituffimmi sakkutooqarfianni qinngussuarmik ikkussuileruttorpoq.
Qinngussuup diameteria 12 meteriuvoq ukiunilu tulliuttuni pingasuni Pituffimmiitinneqassalluni. Galaksip M87-ip ilisimatusarfigineqarneranut atorneqassaaq.
Ukiullu pingasut qaangiuppata ingutseriarlugu Sermersuup qatsinnerpaaffianut, Summit Stationip eqqaaniittumut, nuullugu nappaqqinneqassaaq, naalakkersuisoqarfik taama ilisimatitsivoq.
Amerikamiut ulloriarsiorfiata isumaqatigiissuteqarfigineratigut nunatsinni ilinniartut avataarsuatta ilisimasaqarfigilernissaanut periarfissinneqassapput, ilinniartitaanermut ilisimatusarnermullu naalakkesuisoq, Doris Jakobsen, taama oqarpoq.
- Isumaqatigiinnitta kingunerissavaa Nunatsinni ilinniartut avataarsuanut ilisimatusarnermut tunngasunik periarfissinneqarsinnaanerat kiisalu assassornikkut suliassanut assigiinngitsunut suleqataalersinnaanera, qinngussuup Sermikkut nuunneqarneranut atatillugu pilersaarusiornermi nuussinermilu.
