Pituffik USA-p sakkutooqarfigiinnassavaa?
Sorsunnerup nillertup taamaatinneragut, maannalu peqqarniisaarnianut akiuunnermi, USA-p sakkutooqarnikkut aaqqissuussinini allanngortittariaqarsimavaa. Nunarsuatsinni sakkutooqarfippassuatik, atortuuterpassuatillu atorfissaaruppaat.
USA-p naalakkersuisuisa maannakkorpiaq eqqarsaatigilerpaat Pituffik siunissami sakkutooqarfigiinnassanerlugu, Danmarkimi USA-p aallartitaa James P. Cain nassuiaavoq.
- Nunarsuaq tamakkerlugu sakkutooqarfitik imminut akilersinnaasumik ingerlanneqarnersut USA-mi naalakkersuisut maannakkorpiaq naliliiffigileruttorpaat, aallartitaq James P. Cain nassuiaavoq.
Pituffimmi 500-t missingi amerikamiut sakkutoorinngikkunikkik sulisoraat, Kalaallit Nunaata Landskarsianut akileraarutitigut 110 millioni koruuninik isertitsissutaasartumik. Naallu aallartitap Pituffik siunissami USA-mut pingaaruteqartuaannassangatikkaluaraa, kisiannertaqarpoq.
-Sorsunnerup nillertup taamaatinneragut Pituffimmi sakkutuuvut taama amerlatigiinnarnissaat pisariaaruppoq.
-Maanna sakkutuuvut qanoq amerlatigisut Pituffimmi pisariaqartinnerivut apeqqutaalerpoq, Cain nassuiaavoq.
Qaammatit tulliuttut paasinarsisissavaat Pituffik amerikamiut qanoq annertutigisumik pisariaqartissaneraat. Aallartitarpalaavillunili nassuiaassutigaa Pituffik Islandimi mittarfimmissut Keflavikisut pineqarnavianngitsoq. Tassanimi timmisartuutitik tamaasa uterartippaat, mittarfiullu ingerlannera taamaatillugu. Taamali sakkortutigisumik Pituffik pineqarnavianngitsoq James P. Cain oqarpoq.
-Taama sakkortutigisumik iliuuseqarnavianngilagut. Pituffik uagutsinnut pingaaruteqarpallaarpoq matunissaanut, James P. Caine naggasiivoq.
Pituffimmi mittarfeqarnerminnik isumaqatigiissut Igalikumi 2004-mi isumaqatigiissummut tapertaliullugu USA-p aamma atsiorpaa. 2005-imiit 2015 ilanngullugu isumaqatigiissut 500 millioni dollarsinik, koruuninngorlugu 3 milliardi koruuninik naleqarpoq.
Josef Motzfeldtip erseqqissaatigaa USA uppernarsaasimasoq sakkutooqarfimmi ilaattut Pituffik sipaarniarnikkut eqqorneqassanngitsoq.
Amerikamiut qularnaarlugu nalunaarnerat kalaallit/danskit/amerikamiullu ataatsimiittartoqatigiivisa Permanent Committeep naapinneranni Pituffimmi sipaarniartoqannginnissaanik neriorsuipput.
