Pituffik sipaarniarfigineqassagunanngilaq

Amerikamiut sakkutooqarfiannit, US Air Force-imit, sipaaruteqartoqarnissamik ilimasaaruteqartoqarsimanngitsoq, suliffeqarfiup Greenland Contractorsip pisortaa, Steen Groth Clausen Atuagagdliutinut oqarpoq.

- Greenland Contrators US Air Force-ilu februaarimi marsimilu oqaloqatigiipput, sipaarniartoqarnissamilli eqqaasartoqanngitsoq, Steen Groth Clausen oqarpoq.
 
Namminersorlutik Oqartussani nunanut allanut allaffeqarfimmi pisortaq, Inuuteq Holm Olsen, isumaqarpoq, Pituffimmi Sakkutooqarfik navianartorsiortinneqanngitsoq.

Taassuma innersuussutigaa, USA-p radarimik 1 milliardit koruunit atorlugit ukiut amerlanngitsut matuma siornatigut nutarterisimanera. Aamma qaammataasanik ujarlertarnermi atortup pingaaruteqarluinnartup pigineqarnera, Inuuteq Holm Olsenip innersuussutigaa.

Suliffeqarfik Greenland Contractors amerikamiut Pituffimmi sakkutooqarfianni 440-nik sulisoqarpoq, sakkutuullu 200-t missaanniittut Pituffimmi najugaqarput.

Amerikamiut Pituffimmi sakkutooqarfeqarnerat Nunatta Karsiata ukiumut 100 millionit koruuninik isertitsissutigisarpaa.