USA-p Pituffimmi sakkutooqarfia inukillinikorujussuummat siornatigutulli pingaartigiunnaarnikuuvoq. – Allaat sakkunik tamaani piareersimasuuteqanngilagut, obersti sakkutooqarfimmi nalagaasoq Timothy Bos oqarpoq.Assi: Ida Guldbæk Arentsen/Ritzau Scanpix

Pituffik siornatigutulli sakkoqartiginngilaq

USA-p Pituffimmi sakkutooqarfia siornatigutulli pingaartiginngilaq. Allaat sakkunik tamaani piareersimasuuteqanngilagut, sakkutooqarfiup naalagaa ooqarpoq.

Pituffik 10.000-ngajannit najugaqarfiunikuuvoq, sakkutooqarfiullu radarersua USA-p rakettimik kangianit saassunneqatsaaliinissaanut pingaarutilerujussuusimavoq.

USA-p sakkutuui 200-nit ikinnerusut maanna Pituffimmiipput, tamatumanilu barakkerpassuit timmisartullu inersui imaqanngingajattut USA-p nunarsuarmi qeqertat annersaanni sakkutooqarfeqartariaqarnerminik pingaartitsilluinnarneranut ersersitseqqajanngillat.

USA-llu præsidentiata Donald Trumpip nunatta inissisimanera iluaqutiginiaannarlugu nunatsinnik pisiariumanerareeraluartorluunniit.

Obersti Timothy Bos USA-p Pituffimmi sakkutooqarfiani maanna naalagaasoq aggersaammat danskit tusagassiortui arlallit pingasunngormat sakkutooqarfimmiipput.

Paasissutissat Afghanistanimi qaammataasamit pissarsiarisaraat

Oberstip ilaatigut nassuiarpaa, Pituffimmi sakkutooqarfitsik - rakettimik saassussusisoqaratarnissaanut aarlerisaarivittut atuuffeqarnerata saniatigut - amerikamiut paasissutissanik soorlu Afghanistanimi qaammataasamit pissarsiorfigisartagatuaasa ilagigaat.

Paasissutissammi pissarsiarisartagaat qaammataasanit ækvatori kaajallannagu Qalasersuarli avannarlermiit Qalasersuaq kujallermut nunarsuaq kaajallallugu ingerlaartartunit katersortarpaat.

AAMMA ATUARUK Nutarterisarsimanerit USA-p ukiumut nalunaarusiaani atuarneqarsinnaapput  

Pituffimmi sakkutooqarfiup inissisimaffia eqqarsaatigalugu pingaarutilerujussuartut taaneqartaraluartoq illersugaanngilluinnartuusoq sakkutooqarfimmi naalakkap nassuerutigaa.

- Isertuananga oqaatigisinnaavara nunami saassunneqaratarnissarput ernummatiginngilluinnaripput, silaannarmiillu saassunneqaratarneqarsinnaanerput eqqarsaatigalugu iliuuseqarnissatsinnut sakkunik maanna uninngasuuteqangaanngilagut.

Ruslandip Issittumi qeqertarpaat ilaanni Franz Josefs Landimiittumi Nagurskoyemi mittarfissualioreernerata kingorna silaannarmiit saassusserataannaanissaa eqqartorneqartorujussuuvoq.

Russit timmisartui malersuutit Tunup sineriaanut anngussinnaasut

Russit Nagurskoyemi mittarfissuaqarput, timmisartuilu malersuutit tassannganniit aallariarlutik Tunup sineriaanut - orseriarlutillu Pituffimmi sakkutooqarfimmut allaat - anngussinnaapput.

Pissutsit piviusut tamakkorpiaat pissutigalugit illersornissamut ministeriusimasup Claus Hjort Frederiksenip (V) Danmarkip nunatsinni malersuutinik timmisartuliinissaa qineqqusaarnerminni siunnersuutigaa.

AAMMA ATUARUK Immikkut ilisimasalik: USA qimagunnavianngilaq – periarfissat allat ajornerupput

Timothy Bosilli oqarnera naapertorlugu amerikamiut russit timmisartuisa qaartartunik nakkartitsisartut Pituffimmi radareqarfissuup nungutinnissaa siunertaralugu saassusseratarnissaannut sakkunik pitsaaliuissutissaminnik Pituffimmi Pituffiulluunniit eqqaani piareersimasuuteqanngillat.

- Timmisartunik apuukkiartortoqassagaluarpat mittarfeqarfiup radariatigut taamaallaat takusinnaassagunarparput, sakkunilli allanik annerusunik minnerusunilluunniit piareersimasuuteqanngilagut.

Timmisartunik saassussinerannut akiuutigisinnaasassinnik piareersimasuuteqarpisi?

- Naagga, timmisartunik tamaani piareersimasuuteqanngilagut. Kingullermillu ukiut sisamat-tallimat matuma siorna timmisartumik malersuummik ataatsimik tamaani uninngasuuteqarpugut.

Obersti: Immikkut sungiusarsimasunik taamaallaat sakkutooqarpoq

Aqqartartunik timmisartunut saassussissutigisinnaasassinnik piareersimasuuteqarpisi?

- Uanga naalagaaninni soqanngilaq.

Tassa imaappa, sakkunik piareersimasuuteqanngiivittusi?

- Immikkut sungiusarsimasunik taamaallaat sakkutooqarpoq, taakkulu amerlanngitsunik illuinnarsuuteqarput. Issittumili saassussisoqaratarsinnaanerata iliuuseqarfiginissaa Danmarki Canadalu suleqatiginerisigut immikkut ittumik sulissutigaarput.

AAMMA ATUARUK USA-p Pituffimmik atuinerminut akiliuteqartarnissaa partiit piumasariniaraat

Amerikamiut sakkunik Pituffimmi Pituffiulluunniit eqqaani piareersimasuuteqarnissaminnut tunuarsimaartannginnertik ilisimaneqaatigigaluarpaat.

Assersuutigalugu timmisartoq qaartartunik nakkartitsisartoq B-52-eq Pituffiup eqqaani 1968-imi nakkareersorlu paasineqarpoq brintimit qaartartulianik sisamanik useqarsimasoq.

Amerikamiut sakkutuuisa saniasigut qallunaat, kalaallit amerikamiullu 400-ngajaat Pituffimmi sulimmata Pituffik inunnit 600 tungaannut amerlassusilinnit maanna najugaqarfiuvoq.

    /ritzau/))
 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat