Pituffik pillugu nalunaarusiaq Folketingimi
Pituffimmi amerikamiut sakkutooqarfiata eqqaavissuisa ilaanniit ukiut tamaasa aatsitassat arrortikkuminaatsut, uulia, qitulisaatit, usserutillu kræfteqalissutaasinnasut immamut kuuttuarput.
Folketingimut tunniunneqartoq nalunaarusiaq Avatangiisinut Aqutsisoqarfiup, siunnersuisoqatigiit Niras suleqatigalugu nalunaarusiaavoq. Kalaallit qallunaallu perngaammik suleqatigiillutik mingutsitsinerup annertussusaata paasiniarnera suleqatigiissutigaat.
Assersuutigalugu aatsitassamik krom-imik mingutsitsineq nalinginnaasumut naleqqiullugu 310-eriaammik annertuneruvoq. Amerikamiut siusinnerusukkut mingutsitsinerup avatangiisinut ulorianaateqannginnera nalunaarutigisaraluarpaat, paasineqarporli taamaanngitsoq.
Issi, sermerlu pissutigalugit aatsitassat arriitsuararsumik arroriartortarput, issittumilu avatangiisinut ulorianaatilerujussuullutik.
Niras-ip nalunaarusiaa Danmark-imi Avatangiisinut Aqutsisoqarfik, Namminersornerullutillu Oqartussat, eqqaavitoqarsuit qanoq pineqarnissaannik inassuteqaatiliussapput. Danmark-ip eqqaavinnik saliginissaq isumagalugulu aningasaliiviginiarpaa, suleqatigiissitaliallu nalunaarusiartik aappaagu aasakkut saqqummiuttussaavaa, upernaarulu pinngitsaalisaallutik nuutsitaasimasut qanoq pisoqarnissaanik ilisimatikkiartortussaavaat.
