Pitsanngortoqanngippat aalisarnianngillat
Raajat akii pitsaanerulinngippata, raajarniat tunisiumajunnaarnertik ingerlatiinnassavaat, tunisiumajunnaarnerlu kilisaataatillit nammineerlutik aningaasartuutigissavaat, KNAPK aningaasanik ikiuutaasinnaasunik piareersimasuuteqanngimmat.
Ilulissani najugalik pingasunillu 74-erinik raajarniutinik piginneqataasoq, Sofie S Berthelsen oqarpoq, raajarniarneq imminut akilersinnaajunnaalersoq allanngortoqartariaqartorlu.
- Raajat akiinik isumaqatigiinniarneq uagutsinnut pingaaruteqartorujussuuvoq, massakkummi taamatut ingerlaannartoqassappat raajarniarneq imminut akilersinnaanavianngimmat. Sinneqartoorutaasartut ukiunut siuliinut naleqqiullugit ikiligaluttuinnarsimapput, taamatullu ingerlaannartoqassappat ingerlaannarnissaq imminut akilersinnaajunnaalersimavoq, taamaattumik piumasarput pinngitsuussagutsigu, raajarniaannarnissarput imminut akilersinnaanngilaq, taamaattumik akinik pitsanngortoqanngippat raajarniarunnaavittariaqassaagut. Ilulissani raajarniutinik piginneqataasoq, Sofie S Berthelsen taama oqarpoq.
Sinerissap qanittuani raajarniartarneq ukiumut 200 million koruuninik kaaviaartitsissutaasarpoq.
