Piterarnissaata Tasiilaq tallimanngornermi matugaa
Aqagu tallimanngornermi januuarip ulluisa arfineq-pingajuanni Tasiilami piterartussaasoq DMI-mit aarlerisaatugineqarpoq.
Taamaammat Tasiilami kommunip suliffeqarfii tamarmik aqagu matoqqassapput.
Kommuneqarfik Sermersooq facebookikkut allappoq.
Atuarfiit, paaqqinnittarfiit, allaffiit sunngiffimmilu ornittakkat tallimanngornermi matoqqassasut, kommuni allappoq.
DMI naapertorlugu Tasiilami unnuaru anorlissaaq.
Siullermik avannaq kippasimik sakkortuumik anorleriarluni sakkortuumik anorsarissaaq, anorersuartut sakkortutigisumik anoraasuartarluni. Tallimanngornermi ullup qeqqata siorna sakkortuumik anorersuassaaq anorersuarujussuartut sakkortigisumik anoraasuartarluni.
Piteranera ualikkut sakkukilliartortussaarpasippoq.
Sakkukillissappallu sunngiffimmi ornittakkat ualikkut ammaqqissinnaanissaat naatsorsuutigineqartoq Kommuneqarfik Sermersooq allappoq.