Pisuutitsiniarnerit suleqatigiinnissamut killilliipput

Qinigassanngortittut akornanni ikiaroornartumik ajornartorsiuteqarnegaraalluni pisuutitsiniarnerit qineqqusaarnerni kingullerni imaaginnavipput, ilaatigut Inuit Ataqatigiit Siumumik suleqatigineqarumajunnaarneranik kinguneqartumik.

Siumumit Lars-Emil Johansen sapaatip-akunnerata kingulliup naalernerani qineqqusaarnerni ilaatigut ima oqarpoq:

- Siumut partiiuvoq, siuttoqarnikkut ikiaroornartumik ajornartorsiuteqanngitsoq. Lars-Emil Johansen taama oqarpoq.

Lars-Emil Johansenillumi oqaaseqaatai taakku Siumup Inuit Ataqatigiinnik suleqateqarsinnaaneranut killiliipput, Inuit Ataqatigiit qineqqusaarnerup kingornatigut tusagassiutitigut allammata, Siumut suleqatigisinnaanagu.

Partiit siuttuisa naggataarutaasumik ippassaq unnukkut apeqqarissaarfigineqarneranni ikiaroornartumik atornerluineq aamma saqqummiunneqarpoq. Atassutip siulittaasua Finn Karlsen ilaatigut ima oqarpoq:

- Uanga oqassaanga eqqortumik, uanga nalunngisaqarpunga ikiaroortartunik politikerinik. Finn Karlsen ippassaq unnukkut taama oqarpoq.

Finn Karlsenip oqaaserisai siunissami suleqatigiissinnaanermut kinguneqartinneqassasut Inuit Ataqatigiit siulittaasuannut Josef Motzfeldtimut apeqqutiginiarsimagaluarparput, oqaaseqartinniaraluaratsiguli iluatsinngilarput.