Pisuussutinit akileraarut Inatsisartuni oqaluuserineqassaaq

Akerleriinerli siorna ukiakkulli ersereerpoq. Akitsuutit illuatungiliuttut atuutsilerumasaat, Naalakkersuisut partiillu naalakkersuisuutitaqartut arlaleriarlugit itigartereerpaat. Sulilu itigartitsipput.

Siumup siunnersuutigaa, kaaviiaartitsineq aallaavigalugu pissuussutinut akileraarummik aaqqissuussinermik, aamma Royalties-inik taagorneqartumik, eqqussinissaq siunertaralugu, Naalakkersuisut inatsisip allannguutissaanik kingusinnerpaamik aappaagu upernaakkut siunnersuusioriissasut.

Tassalu piginneqatigiiffiit aatsitasarsiortut kaaviiaartitamik procentiinik qassiujumaarnersunik Nunatta Karsianut akiliisassasut, siunnersuutigaat.

Taava suliffeqarfiit akileraarutinut akiliutaasa appartinneqarnissaat, Siumut illuatigut siunersuutigaa.
Nunarput aatsitassarsiortunit marlutsigut maanna taamaallaat isertitaqartarpoq, tassalu suliffeqarfiit akileraarutinut akiliutaat, 37 procentiusoq, aamma tamakkunani sulisut isertitaminnit akileraarutaat.

Siumulli isiginninnera naapertorlugu ajornartorsiutavoq, suliffeqarfiit aatsaat sinneqartooruteqarsimagunik akileraarutinut akiliuteqartarmata. Tassalu suliffeqarfiit taamaattut sinneqartooruteqarallangunnanngitsut, Siumut isumaqarpoq.

Kisianni immeraassutissaqanngitsoq, inuussutissarsiornermut aatsitassanullu naalakkersuisoq Ove Karl Berthelsen akissuteqaammini, ullumi ullulerneqarsimasumi allappoq.

Kaaviiaartitsineq aallaavigalugu pissutinut akileraarummik Nuatsinni atuutilersitsisoqarpat,  piginneqatigiiffiit Nunatsinni aningaasaliiumajunnaassapput, suliniutillu aallarteriikkat piviusunngunngitsooriaannaapput.

Siumup siunnersuuteqarnerinnaatigut piginneqatigiiffiit soqutiginnittut nalornilereersut, Ove Karl Berthelsenip unnerpaa.

Tassalu pingaarpoq piginneqatigiiffiit nunarput politikkikkut allanngorarfiunngitsutut, atugassarititanillu qaqugukkulluunniit allanngortitsiffiusartuungitsutut, isigissagaat.

Unammillernikkut taama siuarsimanerput, Siumup siunnersuuteqarnerminut nalorninartorsiortileraa, Naalakkersuisoq isumaqarpoq.

Ove Karl Berthelsenip innersuussutigaa, assersuutigalugu Chile, Sverige, Sydafrika aamma Canadami New Foundland Nunavullu aamma sinneqartoorutit tunngavigalugit akileraarusersuimmata. Tassalu taakkua unammillerivut, naalakkrsuisunut ilaasortap eqqaavaa.

Aamma Ove Karl Berthelsenip tikkuarpaa, kaaviiaartitsineq aallaavigalugu pissuussutinut akileraarummik eqqussinissap ajoqutigisarigaa alla, Nunatsinni ingerlatsinermi aningaasartuutit qaffasinnerujussuat. Royaltiesinillu akiliisitseriaaseqalerutta suli qaffannerussapput. Taamaalippallu aatsitassarsiorfiit piffinni aningaasakilliorfinni matoqqajaanerussasut, Naalakkersuisut isumaqarput.

Kiisalu aamma kaaviiaartitsineq aallaavigalugu akileraartsitsinerup kingunerissavaa, aatsitassat akii qaffannerisigut piginneqatigiiffiit sinneqartoorpata, taakkua ilarpassuisa nunatta Karsianut tunngitsoornerat. Ove Karl Berthelsen Akissuteqaammini ilaatigut taama allappoq. Taannalu oqallinnermi eqqarsaatigineqarsimanngitsoq, taanna isumaqarpoq.

Siumup aamma naammaginngilaa, piginneqatigiifit aatsitassamik ujarnerminni piiaanerminnilu CO2-mik aniatitsinerannut tunngasumik, Naalakkersuisut akitsuuserusunngimmata.