Assi: Miguel Discart/Flickr Creative Commons

PISUT: Bruxellesimi saassussinerit pillugit ilisimasavut

Nal. 11.20 nutarterneqarpoq. Belgiami piffissami kingullermi saassussinerit oqartussaasunit peqqarniisaarniarnertut taaneqartut pisimapput.

Bruxellesip timmisartoqarfissuata aallartarfiani ullaap tungaani qaartartumeerisoqarpoq. Ikinnerpaamillu qaartartoq ataaseq imminut pilliutigalugu qaartartumeerinerusoq oqaatigineqarpoq. Inuit arlalissuit toqutaasimasut ikiligaasimasullu nalunaarutigineqarpoq. Aammattaaq qimuttuitsut nunap iluatigoortut unittarfiat, metro, kingorna qaartartumeerneqarpoq.

 

  • Bruxellesimi juutit katersugaasivianni inuit sisamat maajimi 2015-imi aallaaneqarlutik toqutaapput.
  • Aallaasit Parisimi Charlie Hedbomi januaarimi 2015-imi saassuussinermi atorneqartut arlallit Belgiami illoqarfimmi Charleroimi sakkuerniameersuuneri paasineqarpoq.
  • Belgiami politiit illoqarfinni arlalinni januaarimi 2015-imi pakasaapput. Peqqarniisaarniaqatigiinnit saassusserujussuarnissamik pilersaartoqarneranik politiit aarleqquteqarnerat tamatumunnga pissutaavoq.
  • Aggustip qaammataani 2015-imi angut Bruxellesimi qimuttuitsunut ikivoq. Savimmik aallaasinillu arlalinnik sakkulersorsimavoq. Parisimut ingerlaarnermini tigusarineqarpoq.
  • Parisimi novembarip 13-iani 2015-imi inuit 130-t toqutaaffigisaannik peqqarniisaarniartoqarmat peqqarniisaarniat ikinnerpaamik pingasut Belgiamut atassuteqartuupput. Pilersaarusiortutut pasineqartoq, 26-nik ukiulik Belgiamiu Marokkomeersoq Salah Abdeslam, taamani tigusarineqanngitsoorpoq. Syriamut qimaasimanissaa politiit ilimagisimagaluarpaat.
  • Belgiami politiit paasiniaaneranni Bruxellesip illoqarfiata ilaa Molenbeek qitiutinneqarpoq.
  • Politiit marsip 15-iani 2016-imi Molenbeekimi pakasaallutik misissuipput, politiillu tallimanngornermi marsip 18-iani illoqarfiup ilaani inissiamut isertermata, Salah Abdeslam tigusarineqarpoq.
  • Marlunngornermi marsip 22-ani Bruxellesimi timmisartoqarfissuaq Zavemtem marloriarlugu qaartartumeerneqarpoq. Oqartussaasut naapertorlugit inuit ikinnerpaamik 13-it toqutaapput 45-llu aqqunartiterlutik.
  • Nalunaaquttap akunnerata aappaa avillugu qaangiutiinnartoq, EU-p qitiusumik allaffeqarfissuata eqqannguani metrop unittarfiani qaartartumeerneqarpoq. Tassani toqutaasut quliutinneqarput, tamannali suli uppernarsarneqanngilaq.
  • Timmisartoqarfissuarmi qaartartumeerisoqarmat imminut pilliutigaluni qaartartumeerisoqarsimanera Belgiami oqartussaasunit uppernarsarneqarpoq peqqarniisaarniarnertullu taaneqarluni.
  • Saassussinermut akisussaasunik suli nalunaartoqanngilaq.

  • Bruxellesimi ullumi marlunngornermi saassussisoqarnerata kingunerisaanik bussit qimuttuitsullu ingerlanngillat, aamma pisortat sullissivii atuarfiillu matoqqatinneqarput.

Najoqqutarisaq: NTB

/ritzau/

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat