Pisunnermik misilittagartugaluaraanniluunniit piareersarluaqqaarnissaq pingaartoq

Piareersarnissaq suararpassuillu Valdemar Wilhjelm Geislerip pingaartilluinnagarai. Soqutigisaa immaqa pikkunaappalussinnaavoq, kisiannili piareersarluarsimanissaq tassaavoq pinngortitamiinnissaani toqqissisimatitsisussaq.

- Pinngortitamiissatilluni timikkut eqqarsartaatsikkullu piareersimanissaq pingaaruteqarpoq, taanna oqarpoq itisiliillunilu:

- Oqimaatsunik kivitsisinnaassaguit imaluunniit qutaarluusukkut qummukassaguit ammukassaguilluunniit timikkut nukittusariaqarputit. Aqqutaani susoqassanera eqqarsartaatsikkut piareersimaffigisassaapput: Ingerlavissara qanoq ittuua? Sila qanoq issava? Suut poortussavakka?  

Isumannaatsumik pinngortitamiinnissaq pillugu KNR-i ulluni makkunani allaaserisaqaqattaarpoq. Aasaaneranimi pinngortitami misigisassarsiortut amerlitillugit aamma ajutoortunik annaasiniarnerit ujaasinerillu amerlisarput. Qujanartumillu pinngortitami ajutoornaveersaarniarluni nammineq iliuusissarpassuaqarpoq.

Piaareersarnissamik pingaartitsiuaannarneq

Valdemar Wilhjelm Geislerip nassatassani allattorlugit allallu suararpassuit piareersaatigisarpai.

Taanna 63-inik ukioqarpoq akunnerpassuillu kisissaanngitsut pinngortitamiittareerpoq. Sermersuarmi ilisimasassarsiornerit, Canadami Nunavumi qajartortunik angallassinerit, Nuup aamma Kapisilinni illuaraqarfimi eqqaani pisunnerit piniarnerillu misigisaanut ilaapput. Taanna aamma siornatigut politiiunermini inunnik pinngortitami ajoqusersimasunik ukiut tamaasa annaassiniaqataasarpoq.    

Assi © : Lærke Schmidt Fallesen

Naallu pinngortitamiittarnermik sungiussisimalluinnaraluarluni pinerit tamaasa piareersarluaqqaartuaannarpoq.

- Amerlanerpaat nalunngereerpakka, taamaattorli sivisuumik pinngortitamiissatillunga nassatassakka allattortuaannarpakka. Isumannaallisaanermut tunngasut, nerisassat atortullu allattortarpakka aamma Google atorlugu angalaarnissani assigiinngitsuni nassatassat allattorsimaffii pitsaasorpassuit nassaassaapput, Valdemar Wilhjelm Geisler oqaluttuarpoq.   

Ajutoortoqassagaluarpammi piareersaatinik minitaqalaarnerit imaluunniit piareersarluarsimanerit apeqqutaalluinnalersinnaasut taassuma nalunngilaa. Soorlu siallilissagaluarpat imaluunniit kuussuit ikaarnissaannut sillimaneq:  

- Innerit masattussaajunnaarlugit poortuaannarpakka. Aamma sisammik innaallattaatilisartarpunga, ikitsissutiginissaalu misilittareerpara.  

- Ullualunni pinngortitamiissagaangama atisanik sillimmateqartuaannarpunga aamma atortut nammattagarluunniit imermut nakkassagaluarpata puunik erngup pitarsinnaanngisaanik atornissaq pingaarpoq, taanna oqarpoq.

Kikkut tamarmik pisutsillutik kamippatik suli panertut apuukkusuttarput, ilaannili taamaattuaannanngilaq, taamaattumik piareersimasariaqarpoq, Valdemar Wilhjelm Geisler oqarpoq. Assi © : Privatfoto

Allat ilaannit pingaarnerusut

Pinngortitamiinneq pisariusariaqanngitsoq imaluunniit isumannaatsumik asimiinneq akisusariaqanngitsoq, Valdemar Wilhjelm Geisler oqarpoq. Soorlu nipittartorsuaq gaffatape aamma sisammik ungerutissiaq sunik tamangajannik iluarsaanermut iluaqutaalluarsinnaapput.    

Atortorli ataaseq allanit akisunerulaartoq pinngitsoorsinnaanngilaa, tassa ajornartoornermi kalerrisaarut aamma oqarasuaat qaammataasiamut attavilik, taakkumi atorlugit ikiortissarsiorsinnaavoq ilaquttaniluunniit nalunaarfigalugit.

- Ikiortissarsiorsinnaajumallunga iridiummilisartuaannarpunga. Aamma inReach nassartarpara, taanna atorlugu angerlarsimaffinnut allassinnaavunga ilakkalu uannut allassinnaapput sumiinneralu malinnaavigalugu.  

- Pinngortitamiitillunga suli ajutoornikuunngilanga, angalaartillungali atortorujussuusarpakka. Soorlu kingusinnaaruma nalunaarlunga sumiinnermalu nalunnginneqartuannarnissaa qulakkeerniarlugu, taanna nassuiaavoq.

Oqarasuaat qaammataasianut attavilik aamma ajutoornermi kalerrisaarut inReach Nuummi Qinngorpumi angerlarsimaffiup eqqaani quimi piareersimajunaarput. Taakku Valdemar Wilhjelm Geislerip pinngortitamiissatilluni nammattakkaminiitittuaannarpai. Assi © : Lærke Schmidt Fallesen

Takkulu atortut Valdemar Wilhjelm Geislerip aasap manna suliassaani arlalinni pisariaqassapput. Nuummiimmi Kapisilinnut pisuffiusartumi nalunaaqutsersukkat atuaruminarsassavai. Taanna aqqut nammineq arlaleriaqaluni pisuffigisareeraluarlugu piareersarnissi sumiiffiminillu nalunaartarnissi suli pingaarteqai.      

- Aqqutsinni sumut killinnera ilannut soorunami nalunaarutigisassavara. Nuuk-Kap-imi sapaatit-akunnialuisa matuma siorna arpaqataasut ilaat pujornera pissutigalugu tammaraluartoq assersuutissaavoq, taanna oqarpoq.    

Arpaqataasut ilaat qujanartumik ajunngitsoq nassaarineqarpoq, nunatsinnili pinngortitamiinnerup mianersorfissaqaqaaq.