Pisuinnaq angerlariaraluartut
Inuusuttuaqqat pingasut 14-nik ukiullit Sisimiut eqqaanni nunami Utoqqarni illuaqqamiittut angerlarsileramik Sisimiunut ippassaq pisoriaraluarsimapput.
Utoqqarniit Sisimiunut aqqut 20-25 km-inik isorartussuseqarpoq, pisunniallu salaasullutillu nilleqimmat Sisimiunut apuutinngitsuungajavissimapput.
Sisimiut eqqaanni Utoqqarni aallaarsimaaqataasut niviarsiaqqat marluk nukappiararlu ataaseq aallaarsimaffimmi paarsisuminnit akuerisaallutik ippassaq ualisukkut akunnermi ataatsimi pisuttuarsinnaasimapput.
Piffissaq eqqorlugu utinngimmata, unnukkiartulermallu, paarsisuisa ujaarilersimavaat, taarsivallaaleqimalli nassaarinagillu utiinnartariaqarsimapput, politiinullu kalerriillutik.
Sisimiuni politiit angallataat sisak 4 qatserisartunik sisamanik inuttalerlugu ujaasiartortinneqarpoq, Karl Jørgen Lennert, Sisimiuni stationsleder-iugallartoq oqaluttuarpoq.
Qatserisartut Kangerluarsummut ippassaq unnuaqeqqartoq apuussimapput, tussarlutillu illuaqqamut Narsamiittumut, tassa Sisimiunit 10-15 km missaanni ungasitsigisumiittumut ullaaq apuussimallutik inuusuttuaqqat tassaniittut nassaaralugit.
Inuusuttuaqqat ajunngitsut Sisimiunut oqqunneqarput, oqaluttuarsimappullu Sisimiunut aqqutaa nalusimanngikkaluarlugu salaasunnermik qiuleramik illuaqqami unnuiniaannarsimallutik.
