Pisuinnaq angalasoq politiinit ujaarineqartoq
Angut 30-t missaanni ukiulik Qasigiannguani politiinit tallimanngormat ujaarineqarpoq. Angut taanna ilisimatitseqaarani Qasigiannguaniit nunaqarfimmut Ilimanamut pisuinnaq angalasimasoq kingorna paasineqarpoq.
Allattoq Louise M. Kleemann
Politiit tallimanngornermi ullaakkut angutip ilaqutaanit kalerrinneqarput angut tammarsimasoq, ilaqutaasut aamma angut oqarasuaatikkut attavigisinnaasimanngilaat, oqarasuaatini angallattagaq qamissimammagu.
Politiit qatserisartullu ikioqatigiillutik ujaasineq ingerlaannaq aallartippaat. Ujaasinerup aallartinneraniit nalunaaquttap akunneri pingasut qaangiuttut angut oqarasuaatikkut politiinit attavigineqarpoq, ajunnginnerarluni oqarmat ujaasineq unitsinneqarluni.