Pissutsit allanngorneri qimaanernut patsisaatinneqarput

Kalaallit pineqaatissinneqarsimasut Risskovimi tarnimikkut napparsimasut katsorsarneqartarfiani uninngasut kingullertigut toqqissiviilliornerat, qimaanerallu pissutsinik nutaanik pissuteqassangatinneqarpoq.
aggustip 11-at 2010 10:52

Taama isumaqarpoq Risskovimi kalaallit immikkoortortaqarfianni nakorsaaneq, Per Jørgensen.

- Ukiut namminersornerullutik oqartussallu isumaqatigiissuteqarluta suleqatigiiffigisagut toqqissinartumik atugassaqarfiusimapput, kingullertigullu uninngasut inuusuttut nutaat takkussuuttut pissutaallutik toqqissiviilliullattaarneri malunniuttalerput, tamannalu pissutsinik malittarisassanillu sungiukkuminaatsitsinermik pissuteqarsinnaanera ilimagaara.

Risskovimi immikkoortortaqarfimmi pineqartumi nakorsaaneq, Per Jørgensen, oqarpoq.

Qaamatit kingulliit pingasut ingerlaneranni kalaallit qulit Risskovimit qimaasimapput, siullermik maajip sisamaani marluk, tallimanngormat marluk kiisalu sapaatiummat ullaassakkut arfinillit qimaallutik.

Nutaanik uninngasoqalernerata saniatigut aamma ininik nutarterisoqarpoq Risskovillu iluani kalaallit allamut nuunneqarlutik, ilaatigullu arsaattarfeerullutik.

- Siornatigut arsaattarfeeraqaraluarpoq, ullumikkullu nutarterneqarmat uninngasut kisimiillutik imaluunniit oqaloqateqarniarunik akornusersorneqaratik naatsiivik atorsinnaasaat sananeqarnikuuvoq. Ilaasa iluarivaat ilaasali arsaattarfitsik maqaasivaat, Per Jørgensen oqarpoq nangillunilu:

- Neriuppugut kalaallit immikkoortortaqarfiani qangatut pissutsinut toqqissisimanartunut uteqqissalluta. Soorunami apeqqutaalluinnarpoq maanga unittussat tullii qanoq pissuseqarumaarnersut, taakkumi aamma apeqqutaalluinnarput. Soorunami aamma pissutsit uninngasunut pitsaasuunissaat kiisalu inuttut inuuneqarluni nammineerfissaqarluni toqqissisimassagaanni pingaaruteqarluinnarpoq, Risskovimi immikkoortortaqarfimmi pineqartumi nakorsaaneq Per Jørgensen oqarpoq.