Pissusitoqqanik sooq allanngortitsisoqartarnersoq misissuiffigilerpaat
Ilisimatusartunit ukiut qulingiluat tikillugit meeqqat inuttut ajornartorsiuteqarnermik misigisaqarsimasut malinnaavigineqassapput. Tamatumani siunertarineqarpoq aalajangissallugu meeqqat ilaat sooq ajunngitsumik ingerlasarnersut ilaallu sooq nakkaattarnersut.
- Meeqqat ilaasa pissutsinik allanngortitsisarnerat ilaasalu allanngortitsisannginnerat pillugit paasisat pissarsiariumaakkavut meeqqat inuusuttullu eqqugaasimasut pillugit suliassamut aaqqissuussatsinnut iluaqutaasinnaapput, isumalluarpugullu meeqqat pitsaanerusumik inuuneqalersimanngitsut ikiorsinnaanissaannut, taama oqarpoq Mælkebøttenip pisortaa Kisten Ørgaard.
Ilisimatusarnikkut pilersaarut taanna Kalaallit Nunaanni siullersaavoq tassanilu paasisat inunnut Mælkebøttenimi paaqqinnittarfinnilu allani ulluinnarni meeqqanik inuusuttunillu inuttut ajornartorsiuteqartunik sulialinnut ilinniutitut malittarineqassallutik.
- Tamatumani pineqarpoq maligassiaq Mælkebøttenimi kingornalu paaqqinnittarfinni allani meeqqanut ulorianartorsiortunut atatillugu sakkussatut atorneqarsinnaasoq, aammattaarlu suut meeqqanik ilaqutaannillu sullissinermi sunniutaasinnaanerisa paasiniarnissaanni.
Kalaallit Nunaanni nalunaarusiat arlalippassuit takusareerivut, pitsaanerussannginnersorlu meeqqanut aalajangersimanerusunik suliniuteqaraanni, Kirsten Ørgaard akivoq.
- Isumaqarpunga tamatumani pineqanngitsoq taakkua arlaannaasa qinernissaat, tamatumanili pineqartoq suut tamaasa ilanngunnissaat, pissutigalugu ilisimasat ilisimatusarnikkut pissarsiariumaaratsigik atorlugillu, taamaalillutalu meeqqat inuusuttullu eqqortumik sullinniassallugit. Misigisarparput Kalaallit Nunaanni inunnik isumaginninnermi qanoq sunniuteqarnissaq sammineqarnerusartoq, misissuinermilu tassani akissutissat kalaallinit misilittagarineqartut akissutissarsiniarneqassallutik.
Ilisimatusarnikkut pilersaarut ukiut qulingiluat sinnerlugit ingerlanneqassasoq, paasisalli ukiut pingasukkuutaarlugit takkuttassasut Kirsten Ørgaard nassuiaavoq.
Pilersaarutip Kalaallit Nunaanni inissisimanissaa pissutigerpiarlugu malittarinnittussatut suleqatigiit pingaartumik Kalaallit Nunaanni suliaqartunik inuttallit pilersinneqarput. - Taakkua pilersaarut malittarissavaat suliatigullu siunnersuisarlutik, Kirsten Ørgaard naggasiivoq.
